10. LEÇONS LOR BID’AH ET REFUTATION. دروس في البدع والرد على أهل الأهواء - Les Autres - Ene Explication Bref Concernant Le Qadiyanism

ENE EXPLICATION BREF CONCERNANT LE QADIYANISM


PREPARÉ PAR
ABU LAYLAA
SHABBIR CHOWTHEE
(ETUDIANT EN FACULTÉ DE SHARII’AH – UNIVERSITÉ MADIINAH)





INTRODUCTION

Mo glorifié Allaah, mo demande Li So aide, So pardon et So protection, et mo remercié Li pour faveur qui Li pe faire lor moi qui mo pe reussi prepare ene livret avec titre :
ENE EXPLICATION BREF
CONCERNANT
LE QADIYANISM

D’après Aayat Qur-aan et bans Hadiith authentiques, li clair pour comprend qui le prophète Muhammad c’est li-meme dernier prophète qui Allaah fine envoye lor la terre, et alors n’importe qui sanla pretendre qui li ene prophète après Muhammad , li ene grand menteur qui pe invite vers l’egarement.

Le prophète Muhammad fine averti nous qui pour ena apeupres 30 personnes dans so Ummat qui pour declare zotte prophètes, qui soi-disant gagne Wahi depuis Allaah.

Le prophète dire :

وَلَا تَقُومُ السَّاعَةُ حَتَّى يُبْعَثَ دَجَّالُونَ كَذَّابُونَ قَرِيبًا مِنْ ثَلَاثِينَ كُلُّهُمْ يَزْعُمُ أَنَّهُ رَسُولُ اللَّهِ
[ Pas pour ena Qiyaamat jusqu’a qui (Allaah) pour envoye apeupres 30 menteurs, chacun pour pretendre qui li messager d’Allaah.]
(BUKHARI 3340)

Bans Swahaabah aussi ti comprend sa verité la qui pas pour ena aucun prophète après Muhammad , et banla ti comprend qui après la mort du prophète Muhammad , Wahi fine arrete descendre depuis le ciel.

C’est avec sa conception la meme qui bans Swahaabah fine faire Jihaad contre chaque personne qui fine declare li prophète après le prophète Muhammad , tel comme Musaylimah Al-Kazzab, Al-Aswad Al-Anasi, Tulayhah ibn Khuwaylid, Sajaah bintul Haarith.

Dans l’epoque Umawi et Abbasi aussi fine ena certaines personnes qui fine declare zotte prophètes :
Al-Mukhtaar ibn Abi Ubayd Ath Thaqafi (67 H)
Al-Haarith ibn Sa’iid (79 H)
Bayaan ibn Sam-aan
Al-Mughiirah ibn Sa’iid (119 H)
Abu Mansour Al-Ajli
Abul Khattwaab Al-Asadi
Ali ibnul Fadl (303 H)

Dans nous l’epoque aussi fine ena naissance de la religion – le Qadiyanism – qui pretendre qui so leader li ene prophète.

Pour gagne ene notion concernant sa religion la, nous pour explique concernant banla basant lor les points suivants :-
Ene explication generale concernant Qadiyani
Fondateur Qadiyani : Mirza Ahmad
Mirza Ahmad declare li-meme Issa
Mirza Ahmad declare li prophète
Conception Qadiyani dans Allaah
Falsification Qur-aan
Relation Qadiyani avec bans anglais
Relation Qadiyani avec bans musulmans
Est-ce qui bans Qadiyani c’est bans musulmans?
Activités de bans Qadiyani

ENE EXPLICATION GENERALE CONCERNANT QADIYANI

Qadiyani c’est ene religion qui fine prend naissance dans l’inde, dans ene l’endroit qui appelle Qadiyan, pendant qui l’inde ti colonisé par bans anglais.

C’est ene religion fondée par Mirza Ghulam Ahmad, qui fine declare li comme ene prophète.

Dans l’inde sa religion la connue comme Qadiyani, mais dans les autres pays zotte appelle zotte Ahmadi, pour faire croire qui zotte pe suivre le prophète Muhammad . C’est a cause de sa qui zotte pas fine adopté ene nouveau Kalimah, C.a.d. a cause qui zotte dire qui Muhammad c’est li meme Ahmad.

Mirza Ghulam Ahmad declare fine gagne revelation plus qui 10,000 versets, et zotte appelle zotte livre :
“Al-Kitaab-ul-Mubiin الكتاب المبين”

Bans leaders de sa religion la :
· Mirza Ghulam Ahmad (1900 -1908)
· Al-Hakiim Nour-ud-Deen (1908 -1914)
· Mirza Bashiir-ud-Deen Mahmoud Ahmad (1914 -1965)
· Mirza Naaswir Ahmad (1965-1982)
· Mirza Tahir Ahmad (1982-)

Mirza Ghulam Ahmad li l’auteur de plus qui 50 livres. Certains so bans livres c’est :
Izaalat-ul-Awhaam
I’jaaz Ahmadi
Anwaar-ul-Islaam
I’jaaz-ul-Maseeh
Tajalliyaat ilaahiyyah
Dwameemat-ul-Wahi
Twadweeh Maraam
Tableegh Riisaalah
Shahaadat-ul-Quran – The Quran’s witness
Baraaheen Ahmadiyah – Ahmadiyan Proofs

Bans adeptes de Mirza fine compile Mirza so bans Wahi dans livre Tazkirah Wahi Muqaddas.

Livre qui Al-Hakiim Nour-ud-Deen fine ecrire c’est Fasl-ul-Khitwaab.

Certains livres de Bashir-ud-Deen Mahmoud Ahmad :
Anwaar-ul-Khilaafah
Tuhfat-ul-Mulouk
Haqeeqat-un-Nubuwwah

Zotte ena ene lagazette qui sorti tous les jours qui appelle Al-Fadl.

Qadiyani ena ene branche dans Lahore sous leadership de Muhammad Ali. Sa branche la ena ene ti-difference avec bans Qadiyani dans Qadiyan, mais li pas ene difference qui clair. Muhammad Ali, banla dire qui c’est li meme qui fine traduire Qur-aan en anglais pour infiltrer conception Qadiyani dans so traduction. Mais ena dire qui dans sa traduction la, ena aussi la main de Al-Hakeem Nour-ud-Deen la dans.

Pour bans Qadiyani, zotte la ville sacrée C’est Qadiyan, et c’est la meme qui zotte bizin vine faire Hajj.

Calendrier Qadiyani (Noms de zotte bans mois) :
1. As-Swalj
2. At-Tableegh
3. Al-Amaan
4. Ash-Shahaadah
5. Al-Hijrah
6. Al-Ihsaan
7. Al-Wafaa
8. Az-Zouhour
9. Tabouk
10. Al-Ikhaa
11. An-Noubou-ah
12. Al-Fath

Base de zotte Khaliifah actuel :
The London mosque, 16 Gressenhall Road, Southfield, London S.W 18, 5 Q.L England.

FONDATEUR QADIYANI : MIRZA AHMAD

Qadiyani c’est ene secte fondée par MIRZA GHULAM AHMAD.

Li fine né en l’année 1839 dans l’Inde, dans ene l’endroit qui appelle Qadiyan – dans province Panjab.

Mirza Ahmad fine donne 4 versions concernant so bans grands parents :
Bans Moghul
Bans Perses
Bans Chinois
Bans Arabes

(1864 -1868) : Li fine travaille dans tribunal Haakim-ul-Mudeeriyyah (Sialkot court). Pendant sa 4 ans la, li fine apprendre anglais.

Au commencement Mirza Ahmad ti pe declare li comme le reformateur du siecle, et li ti faire ene annonce publique qui li pe ecrire ene livre en 50 volumes pour amene 300 preuves concernant verité de L’Islaam. Mais quand li fine commence publier sa livre la – Baraaheen Ahmadiyah – en l’année 1880, li fine plutot rempli li avec eloges concernant li-meme. En l’année 1882 et 1884 quand li fine publié 3ème et 4ème volume, li fine plutot rempli li avec bans arguments pour qui bans musulmans etre fideles envers bans anglais. Ensuite li fine publié so 5ème volume et c’était sa meme so dernier volume au lieu qui li arrive jusqu’a 50ème volume.

Ensuite li fine faire croire qui c’est li-meme Iisaa qui le prophète Muhammad fine predire pour vini dans dernier l’epoque.

En l’année 1900, Imaam Masjid Qadiyani – Adbul Kareem – fine faire Khutbah et li fine annoncé dans so Khutbah qui Mirza Ghulam Ahmad fine vine prophète. Au commencement Mirza Ahamd ti pe faire croire qui li ene prophète incomplet, ensuite en l’année 1901 li fine annoncé qui li fine vine ene prophète complet, et ensuite li fine meme pretendre qui c’est li-meme le meilleur prophète.

Mirza Ahmad ti pe faire croire qui li ena beaucoup maladies compliqués, afin qui dimounes dire : “Tous cequi li pe dire bizin depuis cote Allaah parcequi ene dimoune malade pas possible li gagne les temps pour reflechir pour dire tous sa bans paroles la.”

Mirza Ahmad ti pe aussi faire beaucoup predictions qui soi-disant sa vine depuis cote Allaah. Mais par l’ordre Allaah majorité so bans predictions pas ti pe vine vrai. Parmi so bans predictions c’était qui li pour marié avec so cousin so tifille – Muhammadi Begum – et qui personne pas pour capave empeche sa mariage la. Mais so cousin fine refuse marier so tifille avec Mirza Ahmad. De la meme façon li ti predire qui li pour mort a l’age de 80 ans, mais li fine mort a l’age de 68-69 ans.

En l’année 1907, ti ena plusieurs debats entre Mirza Ahmad et ene Aalim qui ti appelle Abul-Wafaa Thanaa-ullaah. Après sa bans debats, Mirza Ahmad ti ecrire :
“Oh Celui qui fine envoye moi, mo pe demande Toi pour porte ene jugement entre moi et Thanaa-ullaah, qui To donne la mort a celui qui pe cause menti avant celui qui pe cause vrai.”

Effectivement, après 13 mois, Mirza Ahmad fine mort par cholera le 26 Mai 1908 en Lahore. Ensuite banla fine transporte so le corps a Qadiyan pour enterre li labas – dans cimitière Jannat !

Li mentioné dans plusieurs livres et plusieurs lagazettes qui Mirza Ahmad fine mort pendant qui li ti dans W.C. Sa c’est ene preuve encore qui li ene grand menteur parcequi le prophète Muhammad dire :

مَا قَبَضَ اللَّهُ نَبِيًّا إِلَّا فِي الْمَوْضِعِ الَّذِي يُحِبُّ أَنْ يُدْفَنَ فِيهِ
[ Allaah pas enleve ene prophète excepté dans l’endroit cote sa prophète la ti content qui li etre enterré labas.]
(TIRMIZI 939)

Est-ce qui Mirza Ahmad ti content etre enterré dans W.C.?

MIRZA AHMAD DECLARE LI-MEME IISAA

Mirza Ahmad dire qui le prophète Iisaa fine fini mort et so Qabr dans Kashmir, nonplus qui li fine etre elevé lor le ciel. Ensuite Mirza Ahmad dire qui quand le prophète Muhammad pe cause concernant le retour de Iisaa, li pe faire reference a ene personne ressemblant Iisaa, et nonplus Iisaa li-meme.

Mirza Ahmad dire dans so livre :
[ Bans musulmans et bans Chretiens ena la conception – avec ene ti-difference – qui Iisaa fine etre elevé lor le ciel avec so le corps, et qui li pour descendre depuis le ciel dans ene l’epoque. Mais mo fine prouvé dans mo livre Fath Islaam qui sa c’est ene fausse conception, et mo fine expliqué qui la descente pas pe veut dire descente de Issa, mais c’est ene information metaphorique de l’arrivée d’ene ressemblant a Iisaa, et sa incapable la (Mirza Ahmad) c’est li-meme confirmation de sa information la.]
(TAWDWEEH MARAAM PG 2)

D’après sa citation la nous comprend les points suivants :
Mirza Ahmad pe dementi qui Allaah fine eleve Iisaa lor le ciel avec so le corps.
Mirza Ahmad pe pretendre qui Iisaa pas pour descendre depuis le ciel.
Mirza Ahmad pe pretendre qui c’est concernant so l’arrivée meme qui le prophète Muhammad fine predire quand li fine dire qui Iisaa pour descendre.

Emplus de sa, Mirza Ahmad fine faire bans les autres falsifications pour faire croire qui c’est li-meme Iisaa qui ti ena pour vini :-

Li dire qui quand le prophète Muhammad fine dire qui Iisaa pour descendre avec deux vetements jaunes, sa veut dire qui sa personne la pour ena deux maladies qui li ti ena : douleur la tete et uriner beaucoup a cause diabete.
(BARAAHEEN AHMADIYAH PG 201)

Li dire qui quand le prophète Muhammad fine dire qui Iisaa pour descendre dans Damas, sa veut dire qui li pour apparaitre dans ene l’endroit cote bans dimounes qui habite labas, zotte ena qualité Yazeed dans zotte, et bans habitants Qadiyan c’est bans dimounes qui ena qualité Yazeed dans zotte.

Li dire qui quand fine dire qui Iisaa pas ti ena papa, sa veut dire qui li fine gagne connaissance sans apprendre.
(DWAMEEMAT-UL-WAHI PG 54-55)

Bans Qadiyani dire qui Mariam et Iisaa c’est deux étapes de la vie. D’après Mirza Ahmad, li ti dans l’etape de Mariam en l’année 1882, et en l’annee 1884, li fine vine dans l’etape de Iisaa – fils de Mariam.
(IZAALATOU AWHAAM PG 659)

Parmi zotte bans preuves ridicules qui zotte servi pour dire qui le prophète Iisaa fine fini mort c’est :
“Si nous dire qui Iisaa fine etre elevé lor le ciel et qui Muhammad fine etre enterré dans la terre, sa c’est ene humiliation pour le prophète Muhammad .”

Mirza Ahmad dire :
[ Zotte enterre meilleur messager dans la terre et zotte faire Iisaa montre lor le ciel. Sa c’est ene partage bien injuste. Zotte trouvé et ensuite zotte pas trouvé, zotte trouve la verité et ensuite zotte amene role aveugle.]
(DWAMEEMAT-UL-WAHI PG 35)

Preuve qui zotte servi encore :
“Si nous dire qui Iisaa li encore vivant, sa veut dire qui nous fine faire li vine semblable a Allaah, parcequi Allaah tout seul qui vivant pour tous les temps et Li pas pour mort.”


REFUTATION[1] :

Allaah dire : (4:157-158)

وَمَا قَتَلُوهُ يَقِينًا بَلْ رَفَعَهُ اللَّهُ إِلَيْهِ
[ Certainement banla (bans juifs) pas fine touye li (Iisaa). Mais Allaah fine eleve li vers Li.]

D’après sa Aayat la, nous trouvé qui bans juifs pas fine reussi touye Iisaa parcequi Allaah fine eleve li lor le ciel.

D’après bans Hadiith authentiques, le prophète Muhammad fine predire qui Allaah pour faire Iisaa descendre depuis le ciel pour qui li vine touye Dajjaal.

Rapporté par Abu Hurayrah :

قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ وَالَّذِي نَفْسِي بِيَدِهِ لَيُوشِكَنَّ أَنْ يَنْزِلَ فِيكُمُ ابْنُ مَرْيَمَ حَكَمًا عَدْلًا فَيَكْسِرَ الصَّلِيبَ وَيَقْتُلَ الْخِنْزِيرَ وَيَضَعَ الْجِزْيَةَ وَيَفِيضَ الْمَالُ حَتَّى لَا يَقْبَلَهُ أَحَدٌ حَتَّى تَكُونَ السَّجْدَةُ الْوَاحِدَةُ خَيْرًا مِنَ الدُّنْيَا وَمَا فِيهَا... وَاقْرَءُوا إِنْ شِئْتُمْ (وَإِنْ مِنْ أَهْلِ الْكِتَابِ إِلَّا لَيُؤْمِنَنَّ بِهِ قَبْلَ مَوْتِهِ وَيَوْمَ الْقِيَامَةِ يَكُونُ عَلَيْهِمْ شَهِيدًا)
[ Le messager d’Allaah fine dire :
“Serment lor Celui qui ena mo la vie dans So la main, li bien pres qui le fils Mariam descendre parmi zotte comme ene juge juste; li pour casse la croix, li pour touye cochons et li pas pour accepté Jizyah. L’argent pour autant en abondance qui personne pas pour accepté li. Et ene seul Sajdah pour meilleur qui sa le monde la et tous cequi ena la dans.”
Lire, si zotte oulé (S4V159) :
“Et pas ena personne parmi bans gens du livre excepté qui li pour croire dans li (Iisaa) avant so la mort (dans dernier l’epoque). Et jour Qiyaamat, (Iisaa) pour vine ene temoins contre banla.”]
(BUKHARI 3192)

D’après Tafsiir de Abu Hurayrah, nous trouvé qui pour ena bans gens du livre qui pour amene Imaan dans Iisaa avant qui li mort dans dernier l’epoque.

Donc, basant lor sa Aayat la et sa Hadiith la, ensemble avec Tafsiir du Swahaabi Abu Hurayrah, nous comprend les points suivants :
Allaah fine eleve Iisaa lor le ciel avec so le corps.
Allaah pour faire Iisaa descendre depuis le ciel dans dernier l’epoque.
Celui qui pour vini c’est Iisaa meme, et nonplus ene ressemblant a Iisaa.

Al-Lajnat-ud-Daaimah de l’arabie saoudite fine faire mention 16 Aayat qui bans Qadiyani servi pour dire qui Iisaa fine fini mort, et fine montré comment est-ce qui banla fin mal interprete sa bans Aayat la.
(FATAAWAA ISLAAMIYAH V1 PG 143-149)

MIRZA AHMAD DECLARE LI ENE PROPHÈTE

Au commencement Mirza Ahmad pas ti pe dire qui li ene prophète. Au contraire, dans ene so livre li dire :
[ Mo croire dans tous cequi Ahlus-Sunnah croire, couma mo croire qui Muhammad c’est li-meme le dernier de bans messagers. Celui qui pretendre la prophetie après li (Muhammad ), li ene Kaafir, ene menteur, parcequi mo croire qui le message fine commence avec Aadam et fine termine avec Rasoulullaah.]
(TABLEEGH RIISAALAH 2/2)

Mais sa meme Ahmad Mirza la, en l’année 1900, fine declare li prophète reformateur.

Mirza Ahmad dire :
[ Serment lor Allaah, Celui qui mo Rouh trouve dans So poignée, c’est Li (Allaah) qui fine envoye moi et fine nomme moi en tant qu’ene prophète, et Li fine montré comme verité de mo pretention, bans preuves claires qui arrive jusqua 300,000 preuves.]
(TATIMMAH HAQIQAT-UL-WAHI PG 68)

Mirza Ahmad dire :
[ Mo pas ti parmi bans dimounes connus. Alors, mo Rab fine descendre Wahi lor moi et Li fine dire : “Mo fine choisir toi.”]
(DWAMEEMAT-UL-WAHI PG 28)

Pour arrive jusqua pretention de la prophetie, Mirza Ahmad fine bizin falsifier S 33 V 40, pour faire so bans dimounes comprend qui pas ena aucun contradiction entre le fait qui Muhammad c’est li-meme Khaatam-un-Nabiyyiin et le fait qui li aussi li ene prophète.

Parmi so bans falsifications :
Muhammad c’est li-meme Khaatam-un-Nabiyyiin veut dire qui Muhammad c’est li-meme meilleur prophète.
Muhammad c’est li-meme Khaatam-un-Nabiyyiin veut dire qui Muhammad c’est beauté de bans prophètes.
Muhammad c’est li-meme Khaatam-un-Nabiyyiin veut dire qui Muhammad c’est li-meme stamp qui certifié l’arrivée de bans les autres prophètes après li.

Ensuite, bans Qadiyani dire :
v Couma est-ce qui Allaah capave arrete envoye prophètes quand l’humanité so besoin pour ene prophète c’est ene besoin eternel?
v Si nous dire qui pas ena aucun prophète pour vini après Muhammad , sa veut dire qui Allaah so tresors fine terminé.
v Quand ene personne dans Ummat-Muhammad gagne la prophetie, pas ena aucun contradiction la dans parcequi li encore toujours dans Ummat-Muhammad .

Parmi zotte arguments encore, zotte dire qui d’après S 4 V 69, recompense de bans qui suivre Allaah et So Rassoul c’est qui Allaah pour rassemblé zotte avec bans prophètes, bans veridiques, bans martyrs et bans personnens pieuses.
Bans Qadiyani dire :
Si Allaah fine prive nous de faveur prophetie, qui faire Li ti pour enseigne nous pour supplier Li pour demande Li sa faveur la?[2]

Mirza Ahmad dire encore qui li gagne Wahi en plusieurs langues : Arabe, Farsi, Urdu et meme en Anglais.

Bans Qadiyani pas fine juste pretendre qui Mirza Ghulam Ahmad li ene prophète, mais zotte fine meme dire qui c’est li-meme le prophète Muhammad et c’est li-meme meilleur prophète.

Bashir Ahmad dire :
[ Allaah fine faire Muhammad descendre ene fois encore, dans Qadiyan pour accomplir So promesse.]
(KALIMAT-UL-FASL PG 105)

Bashir Ahmad dire encore :
[ Nous pas en besoin d’ene nouveau Kalimah pour nous Deen pour temoigne prophetie de Ghulam Ahmad parcequi pas ena aucun difference entre le prophète (Muhammad ) et Ghulam Ahmad.]
(KALIMAT-UL-FASL PG 105)

Lagazette Al Fadl No. 92 dire :
[ Pas fine ena aucun difference entre bans Swahaabah du prophète (Muhammad ) et bans zeleves de Mirza Ghulam Ahmad excepté qui l’autre banla ti bans zommes de la première envoie, et sa banla zotte bans zommes de la deuxième envoie.]
(AL FADL NO. 92, 28 MAI 1918)

Mirza Ahmad dire :
[ Allaah fine oulé assimile tous prophètes et tous messagers dans ene seul personne, et c’est mo meme sa personne la.]
(AAINATU KAMAALAATU ISLAAM PG 90)

Mirza Ahmad dire :
[ Beaucoup prophètes fine vini, mais personne pas fine depasse moi concernant connaissance Allaah. Et tous bans prophètes cequi zotte fine gagné, mo tout seul fine gagne tous au complet.]
(DARTHAMEEN PG 287)


REFUTATION[3] :

Pas ena doute tous sa bans falsifications la c’est pure fausseté, parcequi le prophète Muhammad – celui qui Allaah fine confié-li pour explique Qur-aan – fine prononce li tres clairement qui Khaatam-un-Nabiyyiin veut dire le dernier prophète, après lequel pas pour ena aucun prophète pour vini.

Allaah dire : (33:40)

مَا كَانَ مُحَمَّدٌ أَبَا أَحَدٍ مِنْ رِجَالِكُمْ وَلَكِنْ رَسُولَ الله وَخَاتَمَ النَّبِيِّينَ
[ Muhammad li pas personne so papa parmi zotte. Mais li le messager d’Allaah et Khaatam-un-Nabiyyiin.]

D’après sa Aayat la, nous trouvé qui Muhammad li Khaatam-un-nabiyyiin.

Ibn Manzour dire dans so dictionnaire :

وختام القوم وخاتِمهم وخاتَمهم : آخرهم
[ Khitaam du peuple ou Khaatim ou Khaatam : le dernier parmi banla.]
(LIISAAN-UL-ARAB 12/164)

Le prophète dire :

وَإِنَّهُ سَيَكُونُ فِي أُمَّتِي كَذَّابُونَ ثَلَاثُونَ كُلُّهُمْ يَزْعُمُ أَنَّهُ نَبِيٌّ وَأَنَا خَاتَمُ النَّبِيِّينَ لَا نَبِيَّ بَعْدِي
[ Pour ena 30 menteurs dans mo Ummat; chacun pour declare qui li ene prophète. Mais c’est moi qui Khaatam-un-Nabiyyiin, pas ena aucun prophète après moi.]
(ABU DAOUD 3710)

CONCEPTION QADIYANI DANS ALLAAH

Mirza Ahmad fine ecrire certaines paroles concernant Allaah qui pas basé lor Tawheed du tout.

Voici certains so bans paroles :-

[ Allaah fine dire moi : “To pour Moi comme Mo bans zenfants.”]
(RIISAALAT-UL-ARBAEEN PG 23 NO. 4)

[ Allaah fine dire moi : “Ecoutez, oh Mo garçon!”]
(AL BASHARI 1/49)

[ Allaah fine descendre dans moi, et mo l’intermediaire entre Li et tous So bans creatures.]
(KITAAB-UL-BARIYYAH PG 75)

[ Allaah fine dire moi : “Mo faire Swalaat, Mo garde Roza, Mo reste eveillé et Mo dormi.”]
(AL BASHARI 2/97)

[ Allaah fine dire moi : “Oh prophète d’Allaah, Mo pas ti conne toi.”]
(TAZKIRAH WAHI MAQADDAS 5889)

[ Mo fine trouve moi dans reve qui mo-meme Allaah.]
(TAZKIRAH WAHI MAQADDAS PG 195)


REFUTATION :

Sa c’est certaines phrases qui fine etre prononcés par Mirza Ahmad, bans phrases qui contenir Shirk parcequi li fine compare Allaah avec bans creatures.

Allaah dire : (42:11)

لَيْسَ كَمِثْلِهِ شَيْءٌ
[ Pas ena narien semblable a Li (Allaah.)]


FALSIFICATION QUR-AAN

Bans Qadiyani ena ene traduction Qur-aan en anglais par Muhammad Ali a travers lequel zotte fine falsifié beaucoup Aayat Qur-aan pour faire croire qui bans Qadiyani lor la verité.

Nous fine deja fini faire mention comment est-ce qui banla fine falsifié Aayat Qur-aan pour faire croire qui Mirza Ghulam Ahmad li ene prophète, et voici certaines exemples encore comment est-ce qui banla fine prend Aayat Qur-aan pour ene badinage.

Allaah dire : (2:60)

فَقُلْنَا اضْرِبْ بِعَصَاكَ الْحَجَرَ فَانفَجَرَتْ مِنْهُ اثْنَتَا عَشْرَةَ عَيْنًا
[ Nous fine dire : “ (Oh Mousaa) frappe roche la avec to baton.” Alors, douze la sources fine jaillir depuis li.]

D’après sa Aayat la, nous comprend qui Allaah fine faire douze la sources jaillir depuis roche qui Mousaa fine batté avec so baton. Mais bans Qadiyani dire Allaah fine ordonne Mousaa pour alle vers ene montagne lor lequel ena douze la sources.

Allaah dire : (2:63)
وَرَفَعْنَا فَوْقَكُمْ الطُّورَ
[ Nous fine eleve montagne (Sinai) lor zotte.]

D’après sa Aayat la, nous comprend qui Allaah ti eleve montagne Sinai lor Banu Israaiil. Mais bans Qadiyani dire qui Banu Israaiil ti dans ene place bas lor la terre et montagne la ti paraitre la haut banla.

Allaah dire : (2:65)
فَقُلْنَا لَهُمْ كُونُوا قِرَدَةً خَاسِئِينَ
[ Nous fine dire banla : “Vine bans jacquots (singes) rejetés avec la honte.”]

D’après sa Aayat la, nous comprend qui Allaah ti transforme bans juifs dans formes jacquots. Mais bans Qadiyani dire qui Allaah ti transforme zotte les coeurs et zotte comportements.

Bans Qadiyani dire :
Sulaymaan so Hud-hud (la huppe) pas ti ene zoiseau, mais li ti ene humain – chef la force policière secrete dans Royaume Sulaymaan.

Bans Qadiyani dire :
Al-Masjid-ul-Aqswaa c’est zotte Masjid dans Qadiyan, et nonplus Masjid Bayt-ul-Maqdis dans Jerusalem.
(AL FADL VOL 20 NO. 33)

Bans Qadiyani dire :
Rabwah dans S 23 V 50 pe faire reference a zotte l’endroit dans Panjab.

A travers bans falsifications pareille, zotte fine contredire encore beaucoup Aqeedah de l’Islaam. Sheikh Albaani fine faire mention de certains zotte l’egarements :
Banla dire qui pas pour ena resurrection le corps.
Banla dire qui recompense et punition c’est juste lor Rouh sans le corps.
Banla dire qui punition bans Kuffaar li pas eternel.
Banla dire qui Jinn pas existé.
(S. SWAHEEHAH 4/252)


RELATION QADIYANI AVEC BANS ANGLAIS

Qadiyani c’est ene mouvement qui fine apparaitre dans l’Inde pendant qui bans anglais ti pe colonize sa pays la, et qui banla ti pe gagne beaucoup difficulté avec bans musulmans qui ti fine declare Jihaad contre zotte. Dans ene situation pareille, nous trouve naissance de Qadiyani qui ouvertement fine montré zotte fidelité envers bans anglais et fine declare li Haraam pour laguerre contre banla. Bans anglais aussi fine montré zotte satisfaits avec bans Qadiyani et zotte fine faire zotte best pour propage sa conception la, afin qui sa affaiblir la force de bans musulmans.

Mirza Ahmad dire :
[ Cequi mo esperé depuis le gouvernement (anglais) c’est qui zotte agir envers sa famille la – qui li ene plante et ene fabriquation de bans anglais meme – avec toute fermeté, precaution, verification et soins attentifs, et qui zotte ordonne bans dimounes de zotte gouvernement pour agir envers moi et mo Jamaat avec ene sympathie speciale et avec soins superieurs.]
(TABLEEGH RIISAALAH 7/19)

Mirza Ahmad dire :
[ Mo fine depense la majeure partie de mo la vie dans supporte le gouvernement anglais et dans aide zotte. Mo fine ecrire concernant l’interdiction de Jihaad et l’obligation obeir bans qui ena l’autorité – bans anglais – bans livres, declarations et pamphlets, qui si joindre tous ensemble, capave rempli cinquante l’armoires. Mo fine publié tous sa bans livres la dans bans pays arabes, l’Egypte, la Syrie, Turkie, et tous les temps mo l’objectif c’était qui bans musulmans vine fideles envers sa gouvernement la.]
(SHAHAADAT-UL-QURAAN PG 3)

Mahmoud Ahmad dire :
[ Nous remercie Allaah mille et mille fois pour les conquetes de bans anglais. Et raison de sa gaieté et contetement la c’est qui nous Imaam (Mirza Ahmad) ti pe faire Du’aa pour banla zotte conquetes et li ti pe ordonne so Jamaat pour faire Du’aa pour banla, et aussi parcequi banla fine ouvert la porte Da’wah vers Qadiyani, ene la porte qui ti fermé avant sa.]
(LAGAZETTE AL FADL 23 NOV 1918)

Banla dire :
[ Tous bans vrais Ahmadi qui croire dans Mirza Ghulam Ahmad etant ene prophète sacré envoyé par Allaah envers bans dimounes, zotte ena la conception sans aucun flatterie qui gouvernement anglais c’est Allaah So faveur et l’ombrage de So misericorde. Zotte aussi croire qui la vie de gouvernement anglais c’est zotte la vie ]
(AL FADL 13 SEPTEMBRE 1914)

Banla dire :
[ Gouvernement anglais c’est comme si ene paradis pour nous.]
(AL FADL 19 OCTOBRE 1915)

A tel point ti ena ene relation ferme entre Qadiyani et bans anglais jusqua qui Mirza Ahmad ti pe dire qui celui qui amene Wahi a li c’est ene personne dans forme ene jeune anglais.

Sa relation la li pas juste avec bans anglais, mais aussi avec bans juifs dans Israel, parcequi bans Qadiyani fine gagne l’autorization arrange ene centre pour zotte dans Israel, costé avec montagne Kababir[4].


COMMENTAIRE :

Allaah dire : (2:120)

وَلَنْ تَرْضَى عَنْكَ الْيَهُودُ وَلَا النَّصَارَى حَتَّى تَتَّبِعَ مِلَّتَهُمْ
[ Bans juifs et bans chretiens pas pour satisfait avec toi jusqua qui to suivre banla zotte religion.]

Pose ou la question :
Si Qadiyani ti ena ene tigit l’Islaam dans zotte, est-ce qui bans anglais et bans juifs ti pour satisfaits avec banla?

Pas oubliez qui zotte quartier generale trouve dans LONDON!!


RELATION QADIYANI AVEC BANS MUSULMANS

Bans Qadiyani considère bans qui pas accepté Mirza Ghulam Ahmad etant ene prophète, comme bans Kaafir, et basant lor la, banla dire qui bans musulmans c’est bans Kaafir aussi longtemps qui zotte pas amene Imaan dans Mirza Ghulam Ahmad. Banla fine prend ene position pareille basant lor S 4 V 150-152, cote Allaah fine considère bans qui pas amene Imaan dans tous prophètes comme bans Kaafir.

Mirza Ahmad dire :
[ Bans qui fine mort avant moi, pas ena aucun peché lor zotte, et zotte bans innocents. Mais bans qui mo Da’wah fine atteindre zotte, et zotte fine trouve mo bans signes, zotte fine conne moi et mo fine conne zotte, et mo preuve fine completé lor zotte; ensuite zotte faire Kufr avec bans signes d’Allaah et zotte apporte moi du tort, sa banla zotte merite punition d’Allaah.]
(DWAMEEMAT-UL-WAHI PG 46)

Mirza Bashir dire :
[ Tous bans musulmans qui pas jure fidelité a Ghulam Ahmad, zotte bans non-croyants, meme si zotte pas fine entendre so nom.]
(AYINA SADAKAT PG 35)

Mirza Bashir dire :
[ Le fait qui nous croire dans Mirza Ahmad etant ene prophète, et tous bans non-Ahmadi pas croire dans li, sa faire nous considère bans non-Ahmadi comme bans non-croyants basant lor Aayat Quran qui dire : rejete ene prophète c’est rejete tous prophètes.]
(AL FADL 26 - 27 MAI 1922)

Mirza Bashir dire :
[ Nous bizin ni croire dans bans non-Ahmadi zotte Islaam, et ni faire Swalaat derrière zotte, parcequi pour nous, banla zotte bans non croyants dans ene parmi Allaah So bans prophètes.]
(ANWAR KILAFAT PG 89)

Donc, li clair depuis sa bans paroles la qui bans Qadiyani considère bans musulmans comme bans Kaafir :
Zotte pas faire Swalaat derrière nous.
Zotte pas faire Swalaat Janaazah pour ene musulman.
Zotte pas marié zotte tifille avec nous, mais zotte capave marié avec ene musulmane pareille couma zotte endroit marié avec ene chretienne.
Zotte pas assisté bans programmes et reunions de bans musulmans.

Mirza Ahmad dire :
[ Nous assez different de bans musulmans dans tous quitechoses; dans conception en Allaah, dans bans prophètes, dans Qur-aan, dans la prière, Roza, Hajj et Zakaat. Ena ene difference fondamental entre nous.]
(AL FADL 30 JUILLET 1931)

Mirza Ahmad dire concernant bans Ulamaa musulmans :
[ Pas ena narien lor la terre qui plus malpropre qui cochons. Mais malgré sa, bans Ulamaa qui contredire moi, zotte plus malpropre qui cochons.]
(ANJAAM AASIM PG 21)


Refere a : Three Essays On Qadiyanism pg 41-45

EST-CE QUI BANS QADIYANI C’EST BANS MUSULMANS ??

Bans Qadiyani considère zotte comme bans vrais musulmans qui pe pratique ene l’Islaam reformé par Mirza Ghulam Ahmad, et zotte considère bans qui fine reste lor l’Islaam sans reformation comme bans Kuffaar.

Mais pour nous, nous pas ena aucun doute qui bans Qadiyani fine faire Kufr parcequi zotte fine considère zotte Ghulam Ahmad comme ene prophète qui capave change quitechose dans l’Islaam. Pour nous, l’Islaam c’est ene Deen completé par Allaah avant la mort du prophète Muhammad , et alors n’importe qui sanla declare li ene prophète, li ene Kaafir, pareille couma bans Swahaabah ti considère Musaylimah et les autres encore comme bans Kuffaar.

En l’année 1953, representants de 53 parties musulmanes ti faire ene reunion dans Karachi et zotte ti demande gouvernement Pakistan pour considère bans Qadiyani comme bans Kuffaar. Au commencement gouvernement Pakistan ti refusé, mais en l’annee 1984, Tribunal Shariah en Islaamabad fine declare bans Qadiyani comme bans Kuffaar :
Zotte pas endroit appelle zotte religion l’Islaam.
Zotte pas endroit appelle zotte lieux de prière Masjid.
Zotte pas endroit appelle façon qui zotte appelle vers zotte la prière qui sa c’est Azaan … etc.

En avril 1974, ti ena ene conférence mondiale de Raabitwah a Makkah, et la bas aussi ti decrete bans Qadiyani comme bans Kuffaar.

ACTIVITÉS DE BANS QADIYANI

Qadiyani c’est ene religion qui gagne aide avec bans anglais et les autres bans Kuffaar encore, et alors zotte reussi faire beaucoup activités a travers lesquelles zotte reussi convaincre bans musulmans betes, et faire banla rentre dans zotte Deen.

Après seperation de l’Inde et Pakistan, bans anglais ti impose lor gouvernement Pakistan pour mettre le Qadiyani Zafr-ullah Khan comme ministre des affaires étrangères. Sa c’était zotte plan afin qui zotte capave propage zotte fausseté avec facilité.

Zotte fine reussi propage zotte fausseté presque entier le monde : L’Iraq, la Syrie, l’Indonesie, l’Afrique, l’Europe, l’Amerique.

D’après ene recessement assez longtemps, dans le monde entier, zotte ti ena apeupres 343 lieux de prière, 20 dans l’ile Maurice.

Ene parmi bans moyens qui banla fine servi pour embette bans dimounes c’est qui banla fine essaye faire croire qui Qadiyani et l’Islaam c’est ene seule religion.



CONCLUSION

Après qui nous aprrendre l’egarement de sa groupe la, nous demande bans frères et bans soeurs musulmans pour pas tombe dans zotte piège juste a cause ene tigit l’argent dans sa Dunyaa la, oubien juste a cause ene fausse l'amour. Imagine un peu du feu l’enfer aussi.

أقول قولي هذا وأستغفر الله لي ولكم


ABU LAYLAA
SHABBIR
Madiinah
From Wednesday 16.09.98.
To Thursday 24.09.98. (11:20 pm)
Corrigé
Thursday, April 12, 2007
25 Rabi' Awwal 1428
[1] Pour plus details, refere a mo livre : Les grands signes du Qiyaamah.
[2] Pour reponse a sa argument la, refere a mo livre As-Swiraat-Ul-Mustaqiim, pg 26.
[3] Pour plus details, refere a mo livre : Cequi nous bizin conné concernant le prophète.
[4] In Haifa at mount Karmal.