Ene masjid Ideal
INTRODUCTION :Ene Masjid li represente ene grand quitechose dans ene societé. Li pas juste ene place pour faire certaine Ibaadat tel comme Swalaat, Zikr ou Tilaawat Qur-aan, mais li ena ene beaucoup plus grand role qui sa. En verité, Masjid c'est ene centre cote bans frères d'ene localité joindre minimum 5 fois par jour, avec les objectifs suivants :
pour garde zotte Imaan vivant,
pour augmente zotte connaissance,
pour preserve zotte-même contre Shaytwaan,
pour apprendre bans strategies modernes de Shaytwaan et so bans agents,
pour renforcit zotte fraternité,
pour qui chacun gagne tracas de so frère,
pour vivre comme ene communauté exemplaire,
pour organise Da'wah vers bans Kuffaar,
et pour prend bans decisions importants concernant l'Ummah.
Pas ena doute qui c'est coumesa qui Masjid ti pe fonctionné dans l'epoque du prophete et so bans Swahaabah, a travers lequel zotte fine reussit etablir la loi Allaah lor So la terre. Si nous aussi, nous oulé faire quitechose pour sa Ummat la, nous bizin retourne a Masjid, so statue qui li fine gagné avec Allaah afin qui nous Masjid li vine ene Masjid idéal.
CARACTERISTIQUE D'ENE MASJID IDÉAL.
1. L'intention derrière la construction.
Ene Masjid idéal c'est ene Masjid qui fine construit sincerement pour le plaisir d'Allaah. Faudrait pas nous arrange Masjid juste pour montrer lizieux dimounes oubien pour gagne l'honneur. Faudrait pas nous arrange ene Masjid, juste a cause qui nous fine gagne discussion avec certaines personnes, et qui nous ti pe bizin ene base juste pour nous. Faudrait pas qui nous arrange ene Masjid juste a cause qui nous fine perdi election dans ene Masjid existant.
2. Location.
Tanque capave nous bizin choisir ene meilleur l'environnement pour arrange nous Masjid. Nous bizin choisir ene place qui loin de bazare, taverne, Mandir, l'usine, college, garage, poultrie…etc. Nous bizin arrange li dans ene place cote fine ena concentration de bans musulmans, et dans ene place qui facilement accessible. Nous bizin rassure-nous qui nous pas pe arrange nous Masjid lor ene terrain qui dans direction kit Qabr oubien lor terrain qui pas pour nous.
3. Construction.
Ene Masjid bizin ene batiment simple, sans aucun decoration. Bizin evite colonne endans Masjid qui pour casse bans Swaf. Bizin arrange li dans ene façon qui l'air circulé endans. Mimbar bizin en 3 steps et qui li pas collé avec muraille. So moquette bizin unit et nonplus 4/5 couleurs. Rideaux aussi bizin pas attirant. Bizin separe bans madames de bans zommes dans ene façon qui zotte pour capave suivre Jamaat. Rassure-nous direction Qiblah, et prend compte aussi ene parking pour pas mettre difficulté lor les passants.
Erreurs qui bizin pas commettre dans construction :
· Dome et Minaret
· Mihraab
· Abat-jour
· Cadre contenir Aayat Qur-aan ou Du'aa
· Decoration lor Mimbar
· Calligraphie lor muraille
· Gaspillage dans illumination et ventilateur
4. L'administration.
Masjid c'est pas proprieté d'ene personne ou d'ene famille. Masjid c'est lacaze Allaah qui bizin dirigé par bans qui ena plus connaissance. Bans membres du Shuraa (comité) bizin bans dimounes competants :
· Zotte conne zotte Deen
· Zotte ena l'amour pour partique zotte Deen
· Zotte pas fine perdi l'autorité lor zotte famille dans lacaze
· Zotte pas dans bans travails Haraam
Ene membre dans comité Masjid pas capave ene Jaahil, li pas capave ene personne qui pas ena 5 fois Swalaat dans so la vie, li pas capave ene personne qui so tifille pe touyé dans college, et li pas capave ene personne qui pe travaille dans la banque par exemple.
Bans membres du Shuraa bizin joindre regulièrement et bizin ena bon coordination entre zotte. Faudrait pas quicaine prend ene decision lor li-meme, et faudrait pas prend kit decision en negligeant certains. Bizin ena ene bon coordination entre Shuraa et Imaam aussi, afin qui pas gagne bans "clash". Apart sa, li bon si faire bans rencontres "Shuraa–Muswalli" assez souvent, afin qui bans Muswalli senti-zotte concernés et ressenti qui Masjid la li pour zotte aussi. Si mettre ene "suggestion-box" pour recevoir conseils et demandes de bans frères/soeurs, sa aussi li pas mal.
5. La discipline.
Ene Masjid bizin ene place tranquille et discipliné, cote bans dimounes capave concentré dans zotte Ibaadat. Faudrait pas cause fort dans Masjid oubien dans Wudu-Khana. De la même façon, bizin ena discipline en cequi concerne obeir decision qui fine prend par la direction.
6. La comprehension et la coorperation.
Beauté d'ene Masjid c'est Muhabbat qui visible entre so bans Muswalli a travers zotte comprehension et zotte coorperation. Nous pas gagne droit ena rancune pour n'importe qui musulman, surtout pour ene frère qui tous les jours nous pe faire Swalaat avec li dans ene seul Masjid. Faudrait pas nous vine ene l'opposition dans ene Masjid, juste a cause ene probleme qui nous fine gagné avec kit Muswalli oubien a cause qui nous l'opinion fine rejeté. Ene Masjid idéal c'est ene Masjid dans lequel nous trouve chacun faire Salaam a so frère, qui li grand ou qui li petit, et chacun presente avec ene sourire. Faudrait pas qui bans membres du comité divise zotte-même en 2/3 tendances, et faudrait pas nous divise Muswalli d'ene seul Masjid en plusieurs groupes. Bizin aussi ena coorperation pour entretenir Masjid la couma bizin surtout en cequi concerne so nettoyage.
7. La propreté.
Masjid bizin ene place bien propre. Bizin passe aspirateur regulierement lor so moquette. Bizin enleve excrements lezard et n'importe qui quitechose sale qui rentre endans. Wudu-Khana bizin propre. Toilette aussi bizin garde li propre. Serviette pour essuye figure bizin lavé regulierement. Devant la porte Masjid aussi bizin garde propre.
8. Imaamat.
Popularité d'ene Masjid dependre beaucoup lor so Imaam. Si Imaam fine bien choisit, Masjid la vine ene Masjid vivant. Mais si Imaam même pas bon dans ene Masjid, qui progres qui sa Masjid la pour faire?
Ene bon Imaam c'est ene Imaam qui ena les qualités suivantes dans li :
· Li ena ene bon bagage dans connaissance Deen.
· Li lire Qur-aan bien avec Tajweed.
· Li faire so Swalaat posément.
· Li ene pratiquant.
· Li agir bien avec so bans Muswalli et li prend zotte compte.
· Li reste dans disponibilité de bans Muswalli n'importe qui l'heure bizin li.
· Li organise bans programmes et bans causeries benefiques regulierement.
· Li donne bans leçons continuellement.
Ene bon Imaam bizin travaille en cooperation avec Shuraa Masjid. Faudrait pas li faire ene travail sous-tapis pour créer l'opposition ou pour faire coup-d'etat.
Erreur qui certaine comité Masjid faire c'est qui zotte choisir ene Imaam basant lor so jolie lecture et so eloquence, sans prend compte si li lor Sunnah oubien non.
Celui qui pour remplace Imaam dans so l'absence, bizin fini choisir li afin qui sa pas vine ene probleme dans Masjid.
9. Madrassah.
Ene Masjid idéal c'est ene Masjid qui organise so Madrassah dans ene façon prefessionelle :
· Bans Mudarris bizin dignes pour faire sa travail la
· Bizin ena bans cours particuliers pour bans Mudarris regulièrement
· Bizin marche d'apres ene Syllabus bien preparé
· Bizin faire reunion parents souvent pour consientise zotte de zotte responsabilité
· Faire l'examen chaque l'année et donne chacun so certificat
· Donne bans qui sorti premier, bans cadeaux de valeur qui pour encourage zotte
· Faire Madrassah l'heure qui plus facile pour bans zenfants
· Madrassah bizin continué même pour bans grands garçons et bans jeunes filles, même si li ene seul fois par semaine.
Ensemble avec Madrassah, si capave ouvert ene ecole maternelle et ene Daar-ul-Uloum, li pour bon.
10. Leçon.
Ene Masjid idéal c'est ene Masjid qui organise bans cours et bans causeries pour so bans Muswalli pendant toute longue l'année :
· Hifz Qur-aan
· Leçon Aqeedah
· Leçon Fiqh
· Leçon Tarbiiyah pour les jeunes (dans Weekend)
· Leçon Tajweed (pour differents niveaux)
· Leçon Arabe
· Leçon particulierement pour bans madames (pendant la journée)
· Leçon particulièrement pour bans frères/soeurs convertis.
· Causerie chaque vendredi soir (ou chaque quinzaine)
· Recite Hadiith apres Swalaat
· Ecrire Hadiith lor tableau.
Ensemble avec bans leçons, li bon aussi si parfois nous capave distribuer bans livrets et bans rouleaux-casette a bans Muswalli.
Faudrait pas nous invite bans frères pour vine causer dans nous Masjid, sans qui nous encourage bans Muswalli pour vine ecouter. Au contraire, si capave, nous bizin tire bans ti-pamphlets pour invite tous bans habitants de nous localité pour vine profiter, et nous-meme nous bizin les premiers pour donne nous presence. Bans membres comité bizin encourage bans Muswalli pour participe dans sa bans leçons la, par être les premiers pour donne zotte presence.
11. Message Jumu'ah.
Khutbah Jumu'ah d'ene Masjid li donne ene l'idée concernant sa Masjid la so Aqeedah et so Manhaj. Pour qui nous bans Muswalli profiter avec bans Khutbah qui faire, nous bizin quitte sa responsabilité la dans la main de bans qui ena connaissance. Mimbar c'est pas ene place pour vine faire palabre, oubien pour vine pousse vengeance, oubien pour vine faire dimounes comprend qui nous bans terrible, oubien pour vine impose nous l'opinion lor bans dimounes, oubien pour invite bans dimounes pour rentre dans nous Jamaat. Khutbah Jumu'ah bizin ene message qui garde Imaan bans Muswalli vivant, afin qui zotte encouragés pour faire le bien et zotte decouragés pour faire le mal. Khutbah Jumu'ah bizin ene message qui ouvert lizieux de bans dimounes en cequi concerne bans pechés flagrants qui pe ronge la societé et bans nouveaux strategies qui bans Kuffaar pe adoptés pour corrompre bans musulmans.
12. Bans qui gagne pour causé.
Ena Masjid dire : "Nous la porte ouvert pour tous!" et ena dire : "Cote nous, pas n'importe qui sanla gagne pour causé!". En verité, donne ene dimoune la permission pour prend la parole dans nous Masjid, c'est ene grande responsabilité. Nous pas gagne droit laisse bans qui pas digne pour sa travail la, deboute pour causé dans nous Masjid, couma nous pas gagne droit ferme la porte pour bans qui pe propage la verité. Pas a cause qui nous en bonne terme avec ene personne, nous laisse li vine causer dans nous Masjid, et pas a cause qui nous pas d'accord avec ene l'opinion d'ene personne qui pe propage la verité, nous oppose li pour vine traite n'importe qui sujet. Nous pas guette l'eloquence d'ene personne, nous pas guette so popularité, nous pas guette si pas li ena contact avec bans arabes. Nous guette seulement est-ce qui li lor Manhaj de bans Salaf oubien non.
13. Pamphlet et l'affiche.
De la même façon, nous bizin pas laisse partage aucun pamphlet devant nous Masjid, excepté apres qui nous fine gagne renseignement avec bans qui ena connaissance qui tel pamphlet capave laisse partagé. Faudrait pas nous faire negligence concernant sa quitechose la, sinon nous capave contribué dans propagation de fausseté ou mensonge au nom de l'Islaam. Sa li appliqué pour l'affiche aussi.
14. Joli Azaan.
Ene Masjid qui lor Sunnah, li facile pour reconnaitre li juste par so Azaan. Donne Azaan c'est pas vine chanté devant micro, oubien vine faire tapage pour derange dimounes. Comité Masjid bizin choisir ene personne qui ena ene joli la voix et qui conne donne Azaan avec ene bonne prononciation, pour qui li prend sa responsabilité la. Bizin aussi reclame de li la ponctualité. Ene Masjid qui tout coup donne Azaan en retard ladans, bans dimounes même guette li avec ene l'autre regard.
15. Façon faire Swalaat.
Ene Masjid idéal c'est ene Masjid dans lequel ou trouve tous so bans Muswalli faire Swalaat dans ene seul façon – façon qui fine enseigné par le prophete Muhammad (swallallaahu alayhi wasallam). Quand tous Muswalli fine couvert zotte le corps convenablement, fine costé avec ene Sutrah, pe attache la main lor l'estomac, pe faire Rafa-ul-yadayn, et pe mettre bans les autres Sunnah en pratique, sa indique l'amour qui banla ena pour Sunnah et degout qui zotte ena pour Bid-ah. Pour realise sa quitechose la, bizin enseigne bans Muswalli couma le prophete ti pe faire so Swalaat.
16. Revivre Sunnah et combattre Bid-ah.
Ene bon Masjid c'est ene Masjid qui essaye mette en pratique tous Sunnah qui ena relation avec ene Masjid et essaye combattre tous Bid-ah qui dimounes fine inventé en relation avec ene Masjid.
Certains Sunnah a revivre :
· Faire Swalaat dans premier l'heure
· Donne 2 Azaan pour Swalaat Fajr
· 2 Sunnah avant Swalaat Maghrib
· Assizé faire Zikr après chaque Swalaat, surtout après Swalaat Asr
· Tous dimounes costé avec Imaam quand faire Khutbah oubien quand ena kit leçon.
· Faire Swalaat Taraawiih 11 Rakaats
· Collectione Zakaat-ul-Fitr et distribué li a bans pauvres
· Faire Swalaat Eid lor Muswallaa en plein-air
· Faire Swalaat-ul-Istisqaa et Swalaat-ul-Kusouf.
Bid-ah et erreurs qui bizin enlevés :
· Colle ""الله - محمد lor muraille, oubien mette pendule qui contenir sa deux mots la.
· Mette pendule qui faire son.
· Garde chapelets lor Mimbar
· Faire causerie dans bans l'occasions speciales chez bans Bidati, tel comme le mois de Rabii-ul-Awwal ou a l'occasion de Mi'raaj
· Muswallaa (Sajjaadah) specialement pour Imaam
· Donne 2 Azaan pour Jumu'ah sans qui ena so neccessité
· Du'aa en Jamaat apres Swalaat
· Du'aa en Jamaat apres leçon ou causerie
· Dire "Ameen" avant Imaam
· Laisse l'espace dans Swaf
· Donne Azaan endans Masjid
· Pas rempli bans premiers Swaf en premier
· Faire Sunnah Fajr malgré qui Iqaamah fine donné
· Faire Sajdah après Swalaat Farz pour faire Du'aa
· Passe devant bans qui pe faire Swalaat
17. Augmente nombre de bans Muswalli.
Souvent de fois, nous trouve qui nombre de Muswalli dans ene Masjid li reste intact oubien qui li diminué. Pour differencié nous Masjid de sa bans Masjid la, nous bizin organise bans sorties dans nous l'endroit pour alle rappele bans frères qui fine commence faire negligence et même bans frères qui jamais fine mettre lipied dans nous Masjid.
18. Da'wah.
Ene Masjid idéal bizin represente le coeur Da'wah dans place cote li été. Nous bizin organise bans sorties ou bans programmes pour faire le message de la verité arrive jusqua bans Kuffaar. Pour ene commencement, nous capave faire porte-a-porte pour partage bans pamphlets ou bans livrets contenant le message de l'Islaam, ou donne bans rouleaux cassettes gratuitement.
19. Ene place pour bans frères et soeurs convertis.
Dans pays qui nous pe vivre, parfois nous joindre certaines personnes qui fine gagne l'honneur pour accepter l'Islaam, et ensuite apres qui zotte fine bizin quitte zotte lacaze a cause persecution, zotte pas gagne ene place pour zotte cachiette zotte le corps. Donc, quand nous pe arrange ene Masjid, li bon si nous capave faire provision d'ene ou deux la chambres pour qui bans frères et soeurs pareille capave vine loge zotte temporairement, jusqua qui Allaah ouvert ene chemin pour zotte.
20. Librairie.
Apart qui li bon si garde certains livrets dans Masjid pour qui bans Muswalli lire, li important qui Masjid ena ausi so propre librairie dans lequel faire collection de tous bans livres qui fine ecrire par bans ecrivains connus. Bizin motive bans Muswalli, surtout bans jeunes pour beneficié de so presence. Bizin mette ene l'heure pour bans soeurs particulierement. Li bizin ene librairie qui pas reste fermé tous les temps. Avant mettre n'importe qui livres dans sa librairie la, bizin fini faire verifié li. Pas a cause ene personne fine donne certains livres en cadeau, nous juste mettre li dans librairie pour faire beaucoup. Si capave faire ene systeme abonnement aussi, li ti pour bon. Apart livres, si mettre bans rouleaux cassettes, sa aussi li ti pour bon.
21. Aide Sociale
Pour garde nous Masjid vivant, li bon aussi qui nous organise certaines activités en cequi concerne l'aide pour bans pauvres et bans qui dans necessité. Nous capave mettre ene Bayt-ul-Maal deboute pour aide :
· Bans pauvres
· Bans qui zotte lacaze pas bien conditioné
· Bans qui pe gagne difficulté pour finance l'etude zotte zenfants
· Bans qui endettés
· Bans qui ena l'intention commence ene business avec l'argent propre
Soit qui nous donne zotte sa l'argent la en cadeau, oubien qui nous prette zotte li. Si capave faire provision pour fourni aide medicale a habitants de sa localité la, sa aussi li pour bon. Pendant Ramadwaan li bon qui nous organize Iftwaar en Jamaat pour bans Muswalli de nous Masjid.
22. Bans zenfants.
Tanque capave nous bizin encourage bans zenfants pour frequente Masjid, sans neglige la discipline. Nous enseigne bans parents pour qui chacun garde so zenfant avec li, afin qui l'equipe bans zenfants pas joindre pour faire desordre. Pas a cause desordre qui certains faire, nous empeche amene bans zenfants dans Masjid. Si capave arrange ene jardin-zenfant, pres cote Masjid, sa aussi li pour bon.
23. Donne les jeunes la chance.
Dans nous Masjid, nous bizin donne bans jeunes la chance pour developpe zotte potentiel. Avec cooperation de nous Imaam, nous donne les jeunes la chance pour deboute Imaam, pour recite Hdiith après Swalaat, pour ecrire Hadiith lor tableau, pour donne coup-de-main dans Madrassah et pour participe dans les autres bans activités. Faudrait pas nous agir dans ene façon, qui aulieu nous encourage les jeunes pour frequente Masjid, nous faire zotte ressenti qui zotte pas ena aucun role ici.
24. Activités et Losirs pour bans jeunes.
Pour faire bans jeunes attachés avec Masjid, li bon qui nous organise bans activités et bans loisirs, sans neglige separation qui bizin ena entre bans garçons et bans filles. Nous capave organise :
· Quiz entre zotte
· excursion pour bans jeunes garçons
· Book-reading competiton
· Hifz competition…etc.
Si capave ouvert ene club pres avec Masjid pour qui bans jeunes distraire-zotte dans bans jouets qui en conformité avec l'Islaam, et pour garde zotte fit, pas ena doute qui sa li ene bon quitechose.
25. Organize Eid-ul-Fitr/Eid-ul-Ad-haa comme ene vrai fete.
Li bon si a l'occasion de Eid-ul-Fitr/Eid-ul-Ad-haa, nous organize bans programmes et bans loisirs pour bans Muswalli et surtout pour bans jeunes, afin qui nous celebré nous fete comme en vrai fete, sans qui nous depasse les limites.
26. Ene place pour recevoir bans Sheikh.
Li bon aussi qui nous faire provision d'ene la chambre pour recevoir bans Sheikh qui vine Maurice pour faire Da'wah, afin qui nous gagne la chance pour coorperer dans sa grand travail la, et afin qui nous bans Muswalli gagne pour profiter avec zotte connaissance.
27. Ene place pour prend bans decision.
Parfois ena bans decisions qui bizin prend au niveau d'ene l'endroit, qui concerne l'affaire de l'Ummah, et qui li pas correcte si chacun prend so propre decision. Dans sa cas la, meilleur place pour joindre pour prend ene decision ensemble c'est Masjid.
28. Relation avec les autres bans Masjid.
Li bon si nous prend l'initiative – au niveau nous Masjid – pour organize bans rencontres "Inter–Masjid", a travers lequel nous apporte nous contribution pour amene l'unité au sein de l'Ummah. Shaytwaan li la pour créer la haine entre bans Masjid, et alors nous bizin faire nous zeffort pour combattre sa l'ennemi la et preserve nous relation entre nous.
29. Pas derange bans voisins.
Nous bizin aussi prend precaution pour pas derange bans voisins de nous Masjid dans n'importe qui façon, surtout si banla bans non-musulmans.
Nous bizin evite les erreurs suivants :
· Faire causerie (surtout le soir) avec haut parleur
· Faire decharge de l'eau tombe dans zotte la cour
· Laisse bans Muswalli park l'auto devant zotte la porte
· Jette débris dans zotte la cour.
· Faire tapage pendant Ramadwaan avec la sirène.
30. Deboute lor nous lipied financièrement.
Faudrait pas attendre kit projet, pour qui nous alle talle la main avec dimounes pour cherche contribution financière. Nous bizin toujours vote ene l'argent pour Masjid avec lequel nous faire kit business et nous servi so profit pour roule Masjid, et pour realize bans projets qui vini. Meme si ena pour paye ene frère parmi nous pour engage li dans sa travail la, li bon, aulieu qui nous pas ena aucun resource, oubien nous laisse l'argent Masjid dormi sans aucun developpement et sans aucun progres.
LA REALITÉ CONCERNANT HAALAT MAJORITÉ NOUS BANS MASJID ET ENE APPEL POUR REDRESSE LA SITUATION
Cequi ou fine lire dans sa livret la, c'est coumesa qui d'apres Qur-aan/Hadiith et d'apres conseils de bans Ulamaa, nous bans Masjid ti bizin été, mais malheureusement azordijour nous bans Masjid en otage dans la main de bans qui :
Þ zotte fine gradués depuis faculté de "l'ignorance",
Þ zotte dynamiques dans mette cale dans tous bons projets,
Þ zotte bans specialistes dans faire campagne pour canvass bans dimounes pour oppose la verité,
Þ zotte experiencés dans faire ene ti-probleme vine grandeur montagne,
Þ zotte ena la compétence voulue pour pas rate aucun Swalaat Fajr lor lilit,
Þ zotte ena la ponctualité dans-zotte pour pas rate aucun Salaam avec Imaam, et de l'autre coté, après Swalaat, zotte motivés pour quitte Masjid les premiers,
Þ zotte prend tous zotte les temps pour finalement desapprouve ene bon motion, et de l'autre coté zotte pas tardé pour prend decision pour craze tous bons travails,
Þ zotte cause lor la force zotte l'argent ou zotte poste travail,
Þ zotte surveille bien tous cequi pe causé lor Mimbar afin qui zotte gagne pour faire commentaire toute longue la semaine,
Þ zotte ena full potentiel pour arrête Imaam n'importe quand li pe cause ene causé qui a l'encontre de zotte passion,
Þ zotte montré-zotte concernés avec l'affaire de l'Ummah et qui de l'autre coté zotte fine perdi control totale lor zotte madames et zotte zenfants,
Þ zotte l'objectif c'est "gagne role"; tanque qui tous pe deroule dans l'ordre, zotte gonflé, et couma zotte senti-zotte visés, zotte eclaté,
Þ zotte donne zotte cooperation pour gagne felicitations et quand pe bizin affronte l'opposition de bans qui dans l'egarement, zotte rendre zarme,
Þ zotte assume zotte responsabilité couma bizin pour prend l'initiative pour créer palabre et pour amene la destruction aulieu la solution,
Þ zotte declare zotte-meme proprietaire Masjid et zotte amene role dictataire, mais quand pe bizin prend decision qui bizin, zotte montré-zotte incapables et qui zotte pas ena aucun pouvoir,
Þ zotte ena grand vision couma pour servi nom Masjid pour faire zotte propre nom marché,
Þ zotte considere zotte-meme comme "the right man in the right place",
Þ zotte laguerre avec determination pour pas perdi sa place la, en croyant qui c'est ene bon zaffaire sa, mais zotte pas realizé qui si zotte ti demissioné pour qui les autres prend la releve, sa ti pour meilleur pour zotte-meme dans Dunyaa et dans Aakhirat, et zotte ti pour rendre sa Ummat la ene grand service.
SHABBIR
No comments:
Post a Comment