1.L’ISLAAM POUR LES NON-MUSULMANS. الإسلام لغير المسلمين - L’Islaam Pour Bans Qui Interessé Conne Li

INTRODUCTION
Tous intelligents lor surface sa la terre la, zotte en quête de la paix et tranquilité dans zotte la vie. Zotte pe oulé gagne ene tranquilité dans zotte l’esprit et zotte pe oulé vivre en harmonie avec les autres. Mais couma pour atteindre sa objectif la, sa c’est ene question qui nous bizin pose nous-même et nous bizin cherche so vraie reponse.
Pas ena doute qui l’homme li ene petit creature qui so connaisance bien limité dans sa grand le monde qui nous pe vivre la, et alors, si chacun essaye cherche so tranquilité dans so façon, pour plutot ena desordre lor la terre au lieu qui la paix, parcequi chacun pour ena tendance impose so pensée lor les autres. Donc, pour sauve l’humanité de sa probleme la, Le Createur fine envoye ene mode de vie pour nous, dans forme d’ene religion. Celui qui oulé sincèrement jouir so la vie, li ena simplement pour cherche la religion du Createur et vivre d’apres so bans l’enseignements.
Certains dimounes capave essaye faire nous croire qui religion c’est source de bans problemes entre bans dimounes et nonplus source de la tranquilité. Mais sa li vrai seulement en relation avec bans religions qui fine etre falfisiés, et nonplus en relation avec la religion authentique du Createur. Si bans dimounes considere religion comme ene heritage, zotte vine bans suiveurs aveugles et et lerla même zotte defendre fausseté et quitechose qui illogique, juste a cause qui zotte grands-parents ti lor la, et alors, sa termine par discussion et même par la guerre entre bans dimounes. Mais si bans dimounes realizé qui religion c’est qui nous bizin vivre couma le Createur oulé nous vivre, nous tous pour unir lor la verité et lor religion qui le Createur satisfait, et par sa nous pour vivre en paix, en tranquilité et en prosperité.
Sa livret la c’est ene petit ouvrage qui pe cause concernant l’Islaam en tant que religion authentique du Createur. Celui qui etudié li avec ene l’esprit ouvert, Inshaa-Allaah li pour trouve verité de l’Islaam et aussi simplicité de so message, et alors sa capave aide li pour vine ene serviteur fidele a so Createur par mettre so presence dans bans bons travails et reste loin de bans mauvais actions.
L’Islaam – La religion du Createur.
Question:
Qui veut dire L’Islaam?
Reponse:
L’Islaam c’est ene religion, et etant ene mot arabe, so signification c’est “La Soumission”, c.a.d. la soumission de l’homme à so Createur.
Question:
Est-ce qui L’Islaam c’est ene religion juste pour bans arabes?
Reponse:
Non, l’Islaam c’est pas ene religion qui appartenir à bans arabes. Mais c’est religion qui le Createur fine revelé pour tous bans dimounes, pour enseigne l’homme couma pour soumettre-li à so Maitre.
Allaah dire : (25:1)
تَبَارَكَ الَّذِي نَزَّلَ الْفُرْقَانَ عَلَى عَبْدِهِ لِيَكُونَ لِلْعَالَمِينَ نَذِيرًا
[ Benit soit Celui qui fine faire descendre Al-Furqaan (Qur-aan – livre qui faire difference entre le vrai et le faux) lor So serviteur (Muhammad ) pour qui li vine ene avertisseur pour les univers.]
Question:
Est-ce qui L’Islaam c’est ene religion qui fine être nommé en relation à kit fondateur ou en relation à kit l’endroit specifique ?
Reponse:
Non. L’Islaam veut dire “La soumission au Createur”, et alors sa nom la pas ena aucun relation à kit fondateur ou kit l’endroit specifique.
Question:
Qui symbole de l’Islaam?
Reponse:
L’Islaam pas ena aucun symbole. La lune ou pied-tamme jamais ti symbole de sa religion la.
Question:
Couma nous capave dire qui l’Islaam c’est la religion du Createur?
Reponse:
N’importe qui dimoune qui etudié l’Islaam, li pour arrive à la conclusion qui sa religion la li obligatoirement la religion du Createur par l’authenticité, veracité et simplicité de so message.
L’authenticité message de l’Islaam.
Question:
Couma est-ce qui nous capave dire qui le message de l’Islaam c’est ene message authentique?
Reponse:
Le message de l’Islaam c’est ene message authentique parcequi so bans sources c’est bans sources preservés.
Question:
Qui été bans sources message de l’Islaam?
Reponse:
Source message de l’Islaam c’est :
Al-Qur-aan
As-Sunnah/Al-Hadiith
Question:
Qui été Al-Qur-aan?
Reponse:
Al-Qur-aan c’est les paroles du Createur, et li dans forme d’ene livre qui Le Createur fine revele à So dernier messager Muhammad , pour la guidance de l’humanité. Li ene livre en arabe en ene seul volume, et li fine être traduit en plusieurs langues.
Question:
Couma est-ce qui nous capave dire qui Al-Qur-aan c’est livre qui contenir parole du Createur?
Reponse:
N’importe qui sanla lire et etudié Al-Qur-aan, li pour arrive à la conclusion avec toute certitude et conviction qui sa livre la c’est parole du Createur, parcequi li pour trouve li ene livre miraculeux.
Question:
Couma est-ce qui Al-Qur-aan c’est ene livre miraculeux?
Reponse:
Al-Qur-aan li ene livre miraculeux dans differents façons :
Dans so style mélodique.
Dans so message qui pas ena aucun contradiction.
Dans so bans information du passé.
Dans so bans information du future.
Dans so bans information concernant la science.
Dans so preservation.
Question:
Est-ce qui li vrai qui Al-Qur-aan li pas contenir aucun contradiction?
Reponse:
Oui, li vrai. Al-Qur-aan c’est ene livre qui contenir 114 chapitres, et pas ena aucun information dans kit chapitre qui contredire l’information d’ene l’autre chapitre.
Allaah dire : (4:82)
أَفَلَا يَتَدَبَّرُونَ الْقُرْآنَ وَلَوْ كَانَ مِنْ عِنْدِ غَيْرِ اللَّهِ لَوَجَدُوا فِيهِ اخْتِلَافًا كَثِيرًا
[ Est-ce qui banla pas reflechit lor Al-Qur-aan? Si li ti sorti depuis ene l’autre apart Allaah, zotte ti pour trouve beaucoup contradictions la dans!]
Question:
Donne l’exemple de certaines information scientifiques qui Al-Qur-aan contenir.
Reponse:
Voici l’exemple de certaines information scientifiques qui Al-Qur-aan contenir :
Development d’ene zenfant dans ventre de so maman (23:12-14)
Chaque planete pe nagé dans so orbite (36:40)
Au commencement, les ciels et la terre ti forme ene masse compacte. Ensuite Allaah fine sépare les deux (21:30)
Bans montagnes agir couma bans pilliers lor la terre pour sauvegarde so équilibre (31:10)
Ena quitechose qui plus petit qui ene atome. (10:61)
Ena guerison dans du miel (16:69)
Question:
Donne l’exemple de certaines information du passé qui Al-Qur-aan contenir.
Reponse:
Al-Qur-aan fine cause concernant plusieurs evenements du passé :
La Creation de Aadam (Adam) – le premier homme.
La destruction du peuple de prophète Nouh (Noé).
La vie du prophète Mousaa (Moïse).
La destruction de Fir-awn (Pharaon).
Naissance miraculeuse du prophète Iisaa (Jésus) … etc.
Question:
Qui été As-Sunnah?
Reponse:
As-Sunnah c’est les enseignements du dernier messager du Createur.
Question:
Qui sanla le dernier messager du Createur?
Reponse:
Le Createur fine envoye plusieurs prophètes et messagers lor la terre pour invite l’homme vers So l’adoration. Dernier prophète qui Le Createur fine envoye lor la terre c’est le prophète Muhammad .
Question:
Qui sanla le prophète Muhammad ?
Reponse:
Le prophète Muhammad qui aussi connu comme Ahmad c’est ene arabe qui fine prend naissance en l’année 570 A, dans la ville de Makkah. Li fine vivre pendant 63 ans lor la terre, et li fine mort en l’année 633 A, dans la ville de Madiinah. So tombe trouve toujours à Madiinah, pres avec mosquée Al-Masjid-un-Nabawi.
Question:
Est-ce qui bans prophètes avant ti predire la venue du prophète Muhammad ?
Reponse:
Oui. Par exemple, le prophète Iisaa (Jesus) ti proclame clairement qui le Createur pour envoye ene dernier prophète apres li qui pour appelle Ahmad.
Allaah dire : (61:6)
وَإِذْ قَالَ عِيسَى ابْنُ مَرْيَمَ يَابَنِي إِسْرَائِيلَ إِنِّي رَسُولُ اللَّهِ إِلَيْكُمْ مُصَدِّقًا لِمَا بَيْنَ يَدَيَّ مِنَ التَّوْرَاةِ وَمُبَشِّرًا بِرَسُولٍ يَأْتِي مِنْ بَعْدِي اسْمُهُ أَحْمَدُ
[ Et rappelle quand Iisaa – garçon de Mariam (Marie) – ti dire : “Oh zenfants de Israaiil, certainement mo le messager d’Allaah vers zotte, pour confirme Tawraah (La Thora) qui fine vine avant moi, et pour donne la bonne nouvelle d’ene messager qui pour vine après moi qui so nom pour Ahmad.”]
Question:
Qui bans livres qui contenir les enseignements du prophète Muhammad ?
Reponse:
Les enseignements du prophète Muhammad fine être preservés par so bans compagnons (Swahaabah) et fine être compilés dans plusieurs livres, parmi lesquels nous gagne les 6 livres qui plus connus :
Bukhari
Muslim
Nasai
Tirmizi
Abu Daoud
Ibn Maajah
Veracité et Simplicité message de l’Islaam.
Question:
Qui été le message de l’Islaam?
Reponse:
Le message principale de l’Islaam c’est l’adoration du Createur unique, sans passe par l’intermediaire de bans idoles. Le Createur Li trop exalté pour qui li etre representé par bans idoles ou bans creatures.
Allaah dire : (13:36)
قُلْ إِنَّمَا أُمِرْتُ أَنْ أَعْبُدَ اللَّهَ وَلَا أُشْرِكَ بِهِ إِلَيْهِ أَدْعُو وَإِلَيْهِ مَآبِ
[ Dire (oh Muhammad ) : tout simplement mo fine gagne l’ordre pour adore Allaah et pas associé (narien) avec Li. C’est vers Li qui mo invité et c’est vers Li le retour.]
Allaah dire : (17:23)
وَقَضَى رَبُّكَ أَلَّا تَعْبُدُوا إِلَّا إِيَّاهُ
[ Et to Rab (Seigneur) fine declare qui zotte pas faire Ibaadat (adoration) personne excepté pour Li.]
Question:
Qui faire bizin adore seulement le Createur?
Reponse:
Le Createur Li unique, et Li Tout Seul fine créé nous et fine comblé nous de So bans faveurs. Alors, couma est-ce qui nous capave remercie ene l’autre apart Li et couma est-ce qui nous capave adore ene l’autre apart Li?
Allaah dire : (2:21-22)
يَاأَيُّهَا النَّاسُ اعْبُدُوا رَبَّكُمْ الَّذِي خَلَقَكُمْ وَالَّذِينَ مِنْ قَبْلِكُمْ لَعَلَّكُمْ تَتَّقُونَ الَّذِي جَعَلَ لَكُمْ الْأَرْضَ فِرَاشًا وَالسَّمَاءَ بِنَاءً وَأَنْزَلَ مِنْ السَّمَاءِ مَاءً فَأَخْرَجَ بِهِ مِنْ الثَّمَرَاتِ رِزْقًا لَكُمْ فَلَا تَجْعَلُوا لِلَّهِ أَندَادًا وَأَنْتُمْ تَعْلَمُونَ
[ Oh bans dimounes! Adore zotte Rab (Seigneur) Celui qui fine créé zotte et fine créé bans qui ti avant zotte afin qui zotte gagne Taqwaa (zotte obeir Allaah). Celui qui fine faire la terre comme ene tapis pour zotte, et le ciel comme ene toit, Li fine faire la pluie tombé depuis la haut (nuage) par lequel Li fine produire bans fruits comme nourriture pour zotte. Alors, pas mette bans égales à Allaah quand zotte fine conné (qui seul Allaah qui merite toute forme de Ibaadat.)]
Allaah dire : (35:3)
يَاأَيُّهَا النَّاسُ اذْكُرُوا نِعْمَةَ اللَّهِ عَلَيْكُمْ هَلْ مِنْ خَالِقٍ غَيْرُ اللَّهِ يَرْزُقُكُمْ مِنْ السَّمَاءِ وَالْأَرْضِ لَا إِلَهَ إِلَّا هُوَ فَأَنَّى تُؤْفَكُونَ
[ Oh bans dimounes! Rappelle faveur d’Allaah lor zotte. Est-ce qui ena ene l’autre createur apart Allaah qui pe nourrit zotte depuis le ciel et la terre? Pas ena narien qui merite etre adoré excepté Li. Alors, comment est-ce qui zotte capave detourne-zotte (de Li)?]
Question:
Couma nous capave dire qui Le Createur Li unique?
Reponse:
Reconnaitre l’unicité du Createur (Tawhiid) c’est ene quitechose qui trouve dans l’instinct de chaque humain. C’est simplement bans arrogants et bans qui pas reflechi qui essaye dementi sa verité la.
Allaah dire : (14:10)
قَالَتْ رُسُلُهُمْ أَفِي اللَّهِ شَكٌّ فَاطِرِ السَّمَاوَاتِ وَالْأَرْضِ
[(Bans peuples avant) zotte messagers ti dire (zotte) : “Est-ce qui ena doute concernant Allaah – Createur de bans les ciels et la terre?”]
Question:
Couma nous capave prouve l’unicité du Createur logiquement?
Reponse:
Pas ena aucun doute qui Le Createur Li unique, parcequi si ti ena plus qui ene Createur, ti pour ena desordre dans la creation. Qui ti pour arrivé si ene Createur decide pour faire chaud dans ene l’endroit et ene l’autre Createur decide pour faire frais dans sa même l’endroit la et dans sa même moment la?
Allaah dire : (21: 21-22)
لَوْ كَانَ فِيهِمَا آلِهَةٌ إِلَّا اللَّهُ لَفَسَدَتَا
[ Si dans les deux (la terre et le ciel) ti ena plusieurs Ilaah (divinités) apart Allaah, sa deux la (la terre et le ciel) ti pour corrompu.]
Allaah dire : (23:91)
مَا اتَّخَذَ اللَّهُ مِنْ وَلَدٍ وَمَا كَانَ مَعَهُ مِنْ إِلَهٍ إِذًا لَذَهَبَ كُلُّ إِلَهٍ بِمَا خَلَقَ وَلَعَلَا بَعْضُهُمْ عَلَى بَعْضٍ سُبْحَانَ اللَّهِ عَمَّا يَصِفُونَ
[ Allaah pas fine ena aucun zenfant, et ni ena kit Ilaah (ensemble) avec Li. Sinon chaque Ilaah ti pour alle avec cequi li fine créé, et certain ti pour essaye triomphe lor les autres. Allaah Li pure de cequi banla attribué à Li.]
Question:
Qui faire nous pas endroit adore Le Createur par l’intermediaire de bans idoles?
Reponse:
Nous pas capave passe par l’intermediaire de bans idoles parcequi idoles c’est bans objets fabriqués par l’homme qui pas ena aucun pouvoir et aucun capacité. Couma est-ce qui ene objet fabriqué par l’homme capave represente le Createur supreme? Couma est-ce qui ene humain capave prié ene objet qui li même fine fabrique sa? Couma est-ce qui ene humain capave considere comme so Bondieu, ene objet qui pas possede aucun pouvoir?
Allaah dire : (5:76)
قُلْ أَتَعْبُدُونَ مِنْ دُونِ اللَّهِ مَا لَا يَمْلِكُ لَكُمْ ضَرًّا وَلَا نَفْعًا
[(Oh Muhammad ) dire (banla) : “Est-ce qui zotte pe faire Ibaadat d'ene l'autre apart Allaah, celui qui pas possede apporte zotte ni du tort et ni du bien?”]
Allaah rapporte nous parole du prophète Ibraahiim quand li ti dire à so peuple : (37: 95-96)
أَتَعْبُدُونَ مَا تَنْحِتُونَ وَاللَّهُ خَلَقَكُمْ وَمَا تَعْمَلُونَ
[ Est-ce qui zotte pé adore cequi (zotte-même) zotte fine sculpté, alors qui c'est Allaah qui fine créé zotte et cequi zotte faire?]
Question:
Est-ce qui conception qui Le Createur descendre lor la terre dans forme d'ene humain, li ene conception qui vraie?
Reponse:
Non, sa conception la li pas vraie dutout parcequi Celui qui pas ena aucun defaut, couma est-ce qui Li capave abaisse Li-meme pour prend forme d'ene creature qui rempli avec defaut, faiblesse et manquement? Est-ce en prenant forme d'ene humain, Le Createur bizin alle toilette?
Question:
Le Createur Li unique, mais est-ce qui Li ena bans epouses et bans zenfants?
Reponse:
Le Createur Li unique. Pas ena personne et pas ena narien qui egale ou semblable à Li, et alors Li pas ena aucun epouse et Li pas ena aucun zenfant.
Allaah dire : (6:101)
بَدِيعُ السَّمَاوَاتِ وَالْأَرْضِ أَنَّى يَكُونُ لَهُ وَلَدٌ وَلَمْ تَكُنْ لَهُ صَاحِبَةٌ وَخَلَقَ كُلَّ شَيْءٍ وَهُوَ بِكُلِّ شَيْءٍ عَلِيمٌ
[(Allaah) Li Le Créateur de bans les ciels et la terre, qui pas fine être précédé par personne. Couma est-ce qui Li capave ena zenfant quand (en vérité) Li pas fine ena épouse? Li fine créé tous quitechoses et Li ena connaissance de tous quitechoses.]
Les autres aspects conceptionels de l’Islaam
Question:
Qui bans les autres aspects conceptionels qui l’Islaam enseigne nous?
Reponse:
Apres la conception de Tawhiid (l'unicité du Createur), l’Islaam enseigne nous pour croire aussi dans :
Bans anges
Bans livres celestes qui le Createur fine revelé
Bans messagers qui le Createur fine envoyé
Le dernier jour
Destin.
Question:
Qui été bans anges?
Reponse:
Bans anges c’est bans creatures invisibles qui le Createur fine créé et fine confié zotte differents travails.
Question:
Qui bans livres celestes qui le Createur fine revelé?
Reponse:
Le Createur fine revele plusieurs livres, parmi nous gagne :
Zabour
Tawraah (La Thora)
Injiil (L'Evangile)
Dernier livre qui le Createur fine faire descendre et qui fine abroge tous bans livres avant li c’est Al-Qur-aan.
Question:
Qui bans messagers et prophètes qui le Createur fine envoye lor la terre pour la guidance de l’homme?
Reponse:
Le Createur fine envoye plusieurs messagers et prophètes. Parmi nous gagne :
Aadam (Adam)
Idriiss (Idris)
Nouh (Noé)
Houd (Hûd)
Swaalih (Sâlih)
Ibraahiim (Abraham)
Lout (Lot)
Ismaa’iil (Ismaël)
Is-haaq (Isaac)
Ya’qoub (Jacob)
Yousuf (Joseph)
Mousaa (Moïse)
Haaroun (Aaron)
Daawoud (David)
Sulaymaan (Salomon)
Al-Yasa’ (Elisée)
Ilyaas (Elie)
Zakariyyaa (Zacharie)
Yahyaa (Jean-Baptiste)
Iisaa (Jésus)
Shu-ayb (Chu'aïb)
Ayyoub (Job)
Zul-kifl (Dûl-Kifl)
Younus (Jonas)
Yousha’ ibn Noun …. La paix lor zotte tous.
Dernier prophète qui le Createur fine envoyé c’est le prophète Muhammad .
Question:
Qui l’Islaam enseigne nous en cequi concerne la vie apres la mort et le dernier jour?
Reponse:
L’Islaam enseigne nous qui chaque humain ena ene âme (Rouh), et qui apres ene certaine moment, sa âme la quitte so le corps, a travers la mort. Quand li fine mort, so âme reste dans ene le monde different de nous le monde qui connu comme Barzakh. Li reste labas jusqu’a la fin du monde. Quand pour ena la fin du monde, Le Createur pour retourne nous Rouh dans nous le corps après qui Li pour re créé nous, et ensuite pour faire jugement. Celui qui fine vivre comme ene bon serviteur reconnaissant envers Le Createur, li pour gagne le paradis (Jannat) comme recompense, et celui qui fine vivre comme ene mauvais serviteur ingras envers Le Createur, li pour gagne l’enfer (Jahannam) comme punition.
Question:
Comment est-ce qui Le Createur pour capave ré créé nous le corps quand en verité, nous le corps pour fini pourri?
Reponse:
Nous pas ti existé, Le Createur fine créé nous. Est-ce qui li pas plus facile pour qui Li ré créé nous pour ene deuxième fois?
Allaah dire : (19:66)
وَيَقُولُ الْإِنسَانُ أَئِذَا مَا مِتُّ لَسَوْفَ أُخْرَجُ حَيًّا أَوَلَا يَذْكُرُ الْإِنسَانُ أَنَّا خَلَقْنَاهُ مِنْ قَبْلُ وَلَمْ يَكُنْ شَيْئًا
[ L'homme dire : "Est-ce qui quand mo fine mort, pour retire moi vivant?" Est-ce qui l'homme pas rappelle qui avant sa, Nous fine créé li alors qui li pas ti narien?]
Allaah dire : (30:27)
وَهُوَ الَّذِي يَبْدَأُ الْخَلْقَ ثُمَّ يُعِيدُهُ وَهُوَ أَهْوَنُ عَلَيْهِ
[ C'est Li (Allaah) qui commence la création, et ensuite Li pour refaire li (après qui li pour etre détruit) et sa plus facile pour Li.]
Question:
Couma est-ce qui nous capave croire dans le jugement apres la mort?
Reponse:
Le jugement apres la mort c’est ene quitechose logique, parcequi destination d’ene obeissant pas capave égale à destination d’ene desobeissant.
Allaah dire : (32:18)
أَفَمَنْ كَانَ مُؤْمِنًا كَمَنْ كَانَ فَاسِقًا لَا يَسْتَوُونَ
[ Est-ce qui celui qui ti ene croyant li pareille couma ene qui ti ene pervers? Zotte pas égale!]
Question:
Qui l’Islaam enseigne nous concernant le paradis?
Reponse:
Le paradis c’est demeure qui Le Createur fine preparé comme recompense pour So bans bons serviteurs. La dans pour ena tous qualités jouissances et tous qualités amusements, et nous pour vivre la dans pour eternité.
Question:
Qui l’Islaam enseigne nous concernant l’enfer?
Reponse:
L’enfer c’est demeure qui Le Createur fine preparé comme punition pour So bans mauvais serviteurs. En verité, l’enfer c’est ene du feu qui 70 fois plus fort qui du feu qui ena lor la terre, et li aussi contenir tous qualités punitions. Bans infideles pour reste la dans pour l’éternité.
Question:
Qui l’Islaam dire concernant destin?
Reponse:
L’Islaam enseigne nous qui le Createur So connaissance li illimité, et alors, Li conne tous cequi pour arrivé, avant qui sa arrivé. Basant lor sa connaissance la, Le Createur fine ecrire destin de tous So bans creatures, et tous cequi fine ecrire, sa même pour arrivé.
Le rites religieuses de l’Islaam
Question:
Qui bans rites principales qui l’Islaam fine enseigne nous pour accomplir?
Reponse:
Apres qui ene personne fine accepté Tawhiid, li bizin prouve so soumission au Createur par accomplir le rites religieuses qui l’Islaam fine enseigné :
Swalaah
Zakaah
Sawm
Hajj
Question:
Qui veut dire Swalaah?
Reponse:
Swalaah c’est la prière qui ene musulman obligé faire 5 fois par jour, dans bans moments specifiques. Bans zommes faire sa la prière la dans bans mosquées (Masjid) et bans madames capave faire li dans zotte lacaze meme. C’est pour appelle vers sa la prière la même qui nous entendre Azaan 5 fois par jour dans bans mosquées. Celui qui accomplir so Swalaah, li pour etre recompensé par Allaah. Mais celui qui negligent concernant so Swalaah, li pour merite ene punition dure par Allaah.
Question:
Couma appelle les 5 Swalaah qui nous faire par jour?
Reponse:
Les cinq Swalaat qui nous faire par jour c’est :
Fajr
Zuhr
Asr
Maghrib
Ishaa.
Jour Vendredi, au lieu de Zuhr, nous faire ene Swalaah plus speciale qui appelle Swalaat-ul-Jumu’ah.
Question:
Qui veut dire Zakaah?
Reponse:
Zakaah c’est ene charité qui obligatoire lor chaque musulman riche, qui egale à 2.5% de so richesse, et qui bizin partage sa parmi bans qui dans la necessité.
Question:
Qui veut dire Sawm?
Reponse:
Sawm c’est careme qui ene musulman bizin observé pendant 9ème mois islamique qui connu comme Ramadwaan. Sa careme la commence avant levé du soleil et li termine avec le couché du soleil. Pendant sa periode la, ene musulman pas gagne droit mange narien et boire narien, afin qui li ressenti souffrance de bans qui dans la necessité et sa developpe la patience dans li.
Question:
Qui veut dire Hajj?
Reponse:
Hajj c’est le pelerinage qui obligatoire lor chaque musulman qui ena le moyen. Sa pelerinage la, nous alle faire li à Makkah en l’arabie Saoudite, dans 12ème mois islamique qui connu comme Zul-Hijjah, et c’est labas même qui nous faire Twawaaf d’ene batiment qui connu comme Ka’bah.
Bans bons qualités qui l’Islaam fine enseigne nous.
Question:
Est-ce qui l’Islaam fine enseigne nous concernant les autres aspects de la vie?
Reponse:
Oui, l’Islaam étant ene religion complete, li contenir tous bans informations et bans enseignements necessaires, afin qui sa apporte la paix, la tranquilité et la prosperité dans la vie de chaque humain.
Allaah dire : (5:3)
الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمْ الْإِسْلَامَ دِينًا
[ Azordi Mo fine complete pour zotte, zotte Deen (religion), Mo fine perfectionne lor zotte, Mo bans faveurs. Et mo fine satisfait pour zotte, l’Islaam comme religion.]
Question:
Qui bans qualités qui l’Islaam fine enseigne nous pour developper dans nous?
Reponse:
L’Islaam fine enseigne nous pour developpe bans bons qualités dans nous :
L’humilité
La patience
Le sacrifice
L’honneteté
La generosité
La justice.
Question:
Qui l’Islaam fine enseigne nous en cequi concerne nous façon agir envers les autres?
Reponse:
L’Islaam fine enseigne nous pour agir dans meilleur façon et avec justice envers tous bans dimounes :
Nous obligé respecté nous parents et obeir zotte.
Nous obligé preserve nous relation familiale.
Nous obligé agir bien et prend compte nous bans voisins.
Nous bizin vivre comme bans frères et soeurs entre nous, sans prend nous pour meilleur.
Nous bizin aide nous frère et supporte li dans so difficulté.
Nous bizin conseille nous frère …etc.
Question:
Couma L'Islaam fine enseigne nous pour saluer nous frère ou soeur musulman?
Reponse:
A chaque fois qui nous joindre ene musulman, nous salué li par dire li :
As Salaamu ‘alaykum
“Qui ena la paix lor ou!”
Ensuite li repondre nous :
Wa ‘alaykumus Salaam
“Qui ena la paix lor ou (aussi)!”
Question:
Qui L'Islaam fine enseigne nous pour faire avec ene personne qui fine mort?
Reponse:
L'Islaam fine enseigne nous pour agir dans meilleure façon même envers ene mort :
Nous ferme so lizieux.
Nous baigne li.
Nous enveloppe li avec Kafan (ene la toile blanc).
Nous parfume li.
Nous faire ene la prière en concregation pour demande Allaah pour pardonne li.
Nous enterre li dans cimetière.
Après so l'enterrement, nous re-implore Allaah pour pardonne li individuellement.
Question:
Est-ce qui ena “caste systeme” dans l’Islaam?
Reponse:
L’Islaam enseigne nous qui tous musulmans c’est bans frères, sans faire distinction entre les differents races, couleurs ou nationalités.
Mahatma Gandhi said :
[ Someone has said that Europeans in South Africa dread the advent of Islam … They may well dread it, if brotherhood is a sin.]
Miss. Sarojini Naidu, Poetess, in Ideals of Islam, said :
[ It was the first religion that preached and practiced democracy; for in the mosque, when the minaret is sounded and the worshipers are gathered together, the democracy of Islam is embodied five times a day when the peasant and the king kneel side by side and proclaim, God alone is great.]
Question:
Est-ce qui l’Islaam enseigne nous la justice seulement envers bans musulmans?
Reponse:
Non. l’Islaam enseigne nous la justice même envers les non-musulmans et même envers celui qui apporte nous du tort.
Allaah dire : (5:8)
يَاأَيُّهَا الَّذِينَ آمَنُوا كُونُوا قَوَّامِينَ لِلَّهِ شُهَدَاءَ بِالْقِسْطِ وَلَا يَجْرِمَنَّكُمْ شَنَآنُ قَوْمٍ عَلَى أَلَّا تَعْدِلُوا اعْدِلُوا هُوَ أَقْرَبُ لِلتَّقْوَى
[ Oh bans croyants, vine parmi bans qui deboute fermement pour Allaah etant bans temoins avec la justice. Pas laisse degout d’ene peuple faire zotte pas faire la justice. Mais etre juste, sa li plus pres avec Taqwaa.]
Question:
Qui l’Islaam dire concernant le terrorisme?
Reponse:
Dans l’Islaam, le terrorisme pas permissible. Nous bizin agir bien envers tous bans dimounes et invite zotte vers la verité. Pas a cause ene dimoune pas accepté l’Islaam, nous malagir envers li.
Bans pechés.
Question:
Qui l’Islaam dire concernant considere quicaine egale au Createur?
Reponse:
Considere nimporte qui sanla egale au Createur dans n’importe qui façon, c’est peché qui plus grave qui existé, et en arabe appelle li “Ash-Shirk”. Sa peché la existe en differents formes :
Croire dans l’existence de plus qui ene Createur.
Croire qui quicaine ena même capacité qui Le Createur.
Croire qui quicaine capave donne la vie ou la mort.
Croire qui quicaine apart Le Createur capave donne guerison ou maladie.
Adore ene l’autre apart Le Createur .
Faire sacrifice pour ene l’autre apart Le Createur
Invoque ene l’autre apart Le Createur.
Question:
Est-ce qui dans l’Islaam li permissible vine cherche aide, secours ou guerison avec bans morts?
Reponse:
Non, li pas permissible. Au contraire c’est Shirk – peché plus grave qui ena dans l’Islaam.
Question:
Est-ce qui li permissible arrange batiment (Dargah) dans cimitiere de bans musulmans?
Reponse:
Le prophète fine empeche arrange batiment lor n’importe qui sanla so tombe (Qabr), parcequi sa li vine ene moyen pour faire bans dimounes commence adore bans morts au lieu adore le Createur.
Question:
Est-ce qui ene musulman gagne droit faire ene Ibaadat (acte d’adoration) qui le prophète Muhammad pas fine enseigné?
Reponse:
Nous pas gagne droit faire aucun Ibaadat qui le prophète Muhammad pas fine enseigné. Celui qui faire sa, so action être consideré comme ene innovation (Bid-ah) et li pas être accepté aupres d’Allaah.
Question:
Qui l’Islaam dire concernant la sorcellerie?
Reponse:
L’Islaam pas d’accord dutout avec la sorcellerie, parcequi sa li vine a travers bans satans.
Question:
Qui l’Islaam dire concernant l’adultère?
Reponse:
L’Islaam permette ene zomme pour marié jusqu’a avec quatre madames. Mais l’adultère li pas permissible.
Question:
Est-ce qui dans l’Islaam li permissible pour qui ene personne coquin du bien de so prochain?
Reponse:
Non, li pas permissible. Au contraire, le vol c’est parmi bans grands pechés qui l’Islaam fine empeché.
Question:
Qui l’Islaam dire concernant consomation de bans intoxicants?
Reponse:
L’Islaam defendre consomation de bans intoxicants (la boisson alcolique/la drogue/gandia) parcequi par sa ene humain perdi controlle lor so l’esprit et alors li capave tombe dans ene bassesse par commence agir couma bans zanimaux.
Question:
Qui l’Islaam dire concernant consomation de porc?
Reponse:
L’Islaam considere porc comme ene la chair malpropre, et alors li fine defendre consomation de sa la chair la.
Question:
Qui l’Islaam dire concernant l’interet (usure)?
Reponse:
L’Islaam considere l’interet comme ene transaction qui basé lor l’injustice, et alors li fine defendre prend ou donne l’interet, et meme ecrire ou temoigne transaction l’interet.
Question:
Qui l’Islaam dire concernant “bribing”?
Reponse:
Dans l’Islaam, bribing li pas permissible parcequi c’est ene facteur qui ammene corruption dans la societé.
Question:
Qui l’Islaam dire concernant l’indecence?
Reponse:
Dans l’Islaam, l’indecence pas permissible. Ene zomme obligé couvert-li entre so nombril et so genou, et ene madame obligé couvert so le corps en entier, sauf so figure et so deux poignets. Si li couvert so figure et so deux poignets, sa li meilleur pour li.
Question:
Si nous fine arrivé commettre ene peché, qui nous bizin faire pour qui Le Createur pas punit nous pour sa?
Reponse:
L’Islaam fine enseigne nous qui tous dimounes arrivé commettre peché, et pour bonté qui Le Createur ena pour nous, Li fine laisse la porte pardon ouvert. Alors, n’importe quand nous arrivé commettre ene peché, nous bizin demande le Createur pardon pour cequi nous fine faire.
Fête dans l’Islaam.
Question:
Combien fête ena dans l’Islaam?
Reponse:
Dans l’Islaam ena deux fêtes annuelles :
Eid-ul-Fitr
Eid-ul-Ad-haa
Question:
Quand nous celebré Eid-ul-Fitr?
Reponse:
Nous celebré Eid-ul-Fitr, le 1 Shawwaal – dixième mois islamique, apres observe Sawm pendant le mois de Ramadwaan.
Question:
Quand nous celebré Eid-ul-Ad-haa?
Reponse:
Nous celebré Eid-ul-Ad-haa, le 10 Zul-Hijjah – douzième mois islamique. A sa l’occasion la, nous sacrifié bans zanimaux et nous partage sa entre bans proches et bans pauvres.
Question:
Est-ce qui chanté/dansé permissible dans l’Islaam?
Reponse:
Dans l’Islaam, dansé pas permissible du tout. Quant-a chanté, sa aussi li pas permissible excepté pour bans madames a l’occasion de Eid et quand ena mariage, et a condition qui li pas contenir bans paroles obscenes.
Question:
Est-ce qui la musique permissible dans l’Islaam?
Reponse:
Dans l’Islaam, la musique pas permissible excepté qui jour Eid et a l’occasion d’ene mariage, bans madames capave tappe Daff (tambourin) entre zotte.
L’Islaam garantit la paix dans la societé.
Question:
Couma est-ce qui l’Islaam garantit la paix dans la societé?
Reponse:
L’Islaam fine garantit la paix dans la societé par mettre bans punitions severes pour bans qui corrompre la societé.
Question:
Qui punition ena pour celui qui coquin?
Reponse:
Celui qui coquin ene objet qui ena ene valeur considerable, l’Islaam fine ordonne pour coupe so poignet.
Question:
Qui punition ena pour celui qui commettre l’adultère?
Reponse:
Si la personne qui fine commettre sa peché la li ene celibataire, bizin battre li 100 coups fouette, et si li ene personne qui fine deja marié, bizin lapide li jusqua qui li mort.
Question:
Qui punition ena pour celui qui commettre ene crime?
Reponse:
Celui qui touye ene dimoune, d’apres l’Islaam bizin touye li, afin qui les autres gagne leçon et sa empeche zotte verse du sang de bans innocents.
La femme dans l’Islaam
Question:
Couma est-ce qui l’Islaam fine honore la femme?
Reponse:
Dans l’Islaam, bans madames fine être honorées dans differents façons :
Ene madame fine être créée pour même raison qui ene zomme fine être créé, c.a.d, pour adore le Createur.
Le meilleur aupres le Createur c’est celui qui ena plus beaucoup Taqwaa (pieté), même si li ene madame.
Ene madame ena so part dans l’heritage de so bans proches.
Ene parent pas gagne droit force zotte tifilles pour marier avec ene personne qui li pas content.
Pour marier avec ene tifille, ene garçon bizin donne li ene cadeau qui connu comme Mahr.
Ene missier obligé agir dans meilleur façon envers so madame.
Ene bonne epouse fine être considerée comme meilleur fortune du monde.
Si ene madame pas pe satisfait avec so missier, li fine gagne droit pour demande so separation.
L’Islaam garantit paradis à celui qui elevé so bans tifilles dans meilleur façon.
Question:
Couma célébré ene mariage (Nikaah) d'après l'Islaam?
Reponse:
Si ene garçon fine intéressé pour marier avec ene tifille, li bizin adresse à sa tifille là so responsable (so papa ou so frère) et demande li so la main en mariage. Si sa responsable la fine d'accord après consulter la fille, nous célébré Nikaah par ene prononciation officielle dans présence de deux témoins et en donnant à sa tifille la so Mahr (ene don qui chaque fille qui pé marié mérité).
Question:
Est-ce qui ene madame gagne droit remarié apres la mort de so missier?
Reponse:
Quand ene missier fine mort, so madame reste en deuil pendant 4 mois 10 jours, et ensuite apres sa periode la, li gagne droit marié avec ene l’autre.
Accepté la religion de l’Islaam.
Question:
Est-ce qui accepter la religion du Createur c'est ene obligation lor nous tous oubien qui sa li dependre lor chaque individu?
Reponse:
Accepté la religion du Createur c'est ene obligation lor nous tous.
Allaah dire : (3:19)
إِنَّ الدِّينَ عِنْدَ اللَّهِ الْإِسْلَامُ
[ Certainement religion (qui reconnu) auprès d’Allaah c’est Islaam.]
Allaah dire : (3:85)
وَمَنْ يَبْتَغِ غَيْرَ الْإِسْلَامِ دِينًا فَلَنْ يُقْبَلَ مِنْهُ وَهُوَ فِي الْآخِرَةِ مِنْ الْخَاسِرِينَ
[ Et n’importe qui sanla desire ene Deen autre que Islaam, sa pas pour être accepté de li, et dans Aakhirat (au-dela) li pour parmi bans perdants.]
Question:
Avec qui sanla ene dimoune bizin prend permission pour qui li accepté la religion de l’Islaam?
Reponse:
L’Islaam c’est religion du Createur, et alors nous pas ena pour prend permission avec personne pour accepté sa religion la. Ene fois qui nous fine convaincu dans so verité, nous ena seulement pour temoigne Kalimat-ut-Tawhiid.
Question:
Qui été Kalimat-ut-Tawhiid?
Reponse:
Kalimat-ut-Tawhiid c’est la phrase qui symbolise la conception de l’unicité du Createur.
Question:
Couma nous temoigne Kalimat-ut-Tawhiid?
Reponse:
Nous temoigne Kalimat-ut-Tawhiid dans sa façon la :
Ash-hadu allaa ilaaha illallaah.
Mo temoigné qui personne pas merite être adoré
excepté Allaah
Wa Ash-hadu anna Muhammadar Rasoulullaah.
et mo temoigné qui Muhammad li le messager d’Allaah.
Question:
Apres temoignage de sa phrase la, qui nous bizin faire?
Reponse:
Apres temoignage de sa phrase la, nous faire Ghusl (baigné) et nous commence mettre en pratique tous cequi le Createur fine ordonne nous et nous abstenir de tous cequi Li fine empeche nous.
Question:
Couma nous vine ene meilleur musulman?
Reponse:
Pour vine ene meilleur musulman, nous bizin apprendre nous l’Islaam beaucoup afin qui nous pas contredire bans l’enseignements de l’Islaam basant lor l’ignorance, et afin qui nous evite bans faussetés qui certains musulmans fine attribué a l’Islaam.
Question:
Qui bans livres qui ou conseille moi lire pour qui mo gagne ene connaissance authentique concernant l'Islaam?
Reponse:
Nous conseille ou pour lire bans livres qui publiés par l'imprimerie 'Dar-Us-Salam' de l'Arabie Saoudite.
Preparé par
SHABBIR CHOWTHEE
263-9375/768-4083