Explication Simple Couma Faire Hajj & Umrah
PREFACE
Nous glorifié Allaah, nous demande Li So aide, So pardon et So protection, et nous remercié Li pour faveur qui Li pé faire lor nous qui nous pé reussi prepare ene livret lor Hajj et Umrah.
Sa livret là li ene travaille bien simple et facile parcequi c’est ene resumé de nous livre lor Hajj et Umrah. Et a cause qui ça travaille là li ene resumé, nous pas fine faire mention de bans preuves; nous fine plutot prepare li étant ene guide pendant le moment qui ou pe faire Hajj et Umrah. Celui qui interessé avec bans preuves avant publication de nous deuxième livre, li capave contacter nous.
Nous demande Allaah qui Li recompense nous tous qui fine contribué pour prepare ça travaille là jusqu’a dans ça forme là, et qui Li faire nous bans frères et soeurs musulmans profité avec ça livret là, et accorde nous tous ene Hajj Mabroor.
ABU LAYLAA
SHABBIR
29.11.96
Premier edition : Hajj 2000
Deuxième edition : Hajj 2004
CONSEILS AVANT ALLE FAIRE HAJJ.
Premier quitechose qui nous bizin prend compte quand nous fine decide pour alle faire Hajj c’est nous Niyat. Nous obligé ena Niyat qui nous pe alle faire Hajj sincèrement pour atteindre le plaisir d’Allaah, et nonplus pour gagne titre “Hajee” oubien pour vine promener dans l’Arabie.
Deuxième quitechose qui nous bizin prend en consideration c’est qui nous bizin alle faire Hajj avec l’argent propre et nonplus avec l’argent Haraam, tel comme l’argent malgagné ou l’argent l’interet.
Troisième quitechose qui nous bizin prend en consideration c’est qui nous bizin apprendre couma faire Hajj d’apres Sunnah. Avant ou alle faire Hajj, a Maurice meme li bon qui ou fini apprendre couma faire Hajj. Beaucoup dimounes vine faire Hajj sans conner qui bizin faire et qui bizin pas faire. Possible zotte faire ene erreur qui gate zotte Hajj completement oubien diminué so Thawaab, et possible zotte rate ene rite qui gate zotte Hajj completement oubien diminué so Thawaab. Est-ce qui ou content pour depense tous sa l'argent la et ensuite quand ou pé retourne Maurice, ou pas fine gagne le titre “Hajee” auprés d’Allaah?
Quatrième quitechose important qui nous bizin prend compte c’est critère lor lequel nous basé pour choisir nous groupe Hajj. Ou bizin choisir ene bon groupe pour qui ou vine faire Hajj; dans lequel ena bans frères qui vraiment content Allaah et so Rassoul, dans lequel ena bans frères qui ena un peu connaissance concernant Deen Islaam, Aqeedah et Hajj, dans lequel bans zommes étrangers pas pé reste ensemble avec bans madames étrangères dans ene seule la chambre.
Cinquième quitechose qui nous bizin prend compte c’est qui nous l’etat d’esprit en tant qu’ene Hajee pas capave couma l’esprit de bans barbares. Nous pas capave pe alle faire Hajj et nous pe encore nourrit la barbarie dans nous le coeur. Nous bizin calme, comprehensif, cooperatif, et nous bizin pas faire palabre.
Sixième quitechose qui nous bizin prend compte c’est qui dans Hajj bizin ena patience parcequi en verité Hajj li pas ene quitechose qui facile. Hajj pas faire dans salon, mais Hajj faire lor coltard.
IHRAAM.
Pour alle faire Hajj/Umrah, nous bizin rentre dans l’etat Ihraam.
Li Sunnah pour prend ene bain avant rentre dans l’etat Ihraam. (Sa li Sunnah pour bans madames qui dans zotte periode Haid aussi).
Li aussi Sunnah pour bans zommes seulement qui zotte parfume zotte le corps avec ene parfum qui pas ena tache Pour bans madames, li pas permissible.
Linge Ihraam pour bans missiers :
Izaar : ene la toile qui nous enveloppe nous depuis nous nombril jusqu’a la haut nous cheville.
Ridaa : ene la toile qui nous enveloppe nous lor nous deux zépaules.
li Sunnah qui nous linge Ihraam li couleur blanc.
Linge Ihraam bans madames:
Pas ena aucun linge speciale pour bans madames pour Ihraam. Mais seulement madame la bizin couvert li avec ene l’habillement islamique.
MIIQAAT pour bans mauriciens.
Pour rentre dans l’etat Ihraam, nous bizin attendre jusqua qui nous arrive a Miiqaat.
Si nous pe vine Makkah depuis l’Ile Maurice par ene vol directe, nous mette nous linge Ihraam depuis Maurice meme (depuis nous la caze), et quand arrive a Miiqaat Yalamlam – apeupres 20 minutes avant arrive l’arabie, nous rentre dans l’etat Ihraam et nous commence faire Talbiyah.
Si nous pe vine Makkah depuis l’Ile Maurice par ene vol qui pas directe, si ena assez les temps, nous mette nous linge Ihraam a pays qui nous pour faire escale et ensuite nous Miiqaat c’est Yalamlam meme, et si pas ena assez les temps, nous bizin fini mette nous linge Ihraam a Maurice meme, ou dans avion si possible.
Si depuis l'Ile Maurice nous pe vine Madiinah, nous pas ena pour mette nous linge Ihraam. Mais c'est a Mediinah meme – Miiqaat Zul Hulayfah – qui nous rentre dans l'état Ihraam.
Quand nous arrive a Miiqaat, pour qui nous rentre dans l'état Ihraam, li Sunnah qui nous tourne nous vers Qiblah, et li meilleur qui nous assize dans nous transport et ensuite nous faire face Qiblah.
Nous rentre dans l’etat Ihraam par prononce :
لَـبَّـيْـكَ الـلَّـهُمَّ عُـمْـرَةً
“Labbayk allaahumma umratan”
“Mo present (mo pe repondre To l’appel) oh Allaah, pour ene Umrah.”
Si nous peur qui capave arrive nous ene accident lor chemin et nous pas reussi arrive Makkah, alors nous lire sa Duaa la aussi :
الـلَّـهُمَّ مَـحِـلِّي حَـيْـثُ حَـبَـسْـتَـنِي
“Allaahumma Mahillii haythu habastanii”
“Oh Allaah mo lieu de sacrifice c'est n'importe cotesa qui To fine bloque moi.”
Ensuite nous commence faire Talbiyah a haute voix :
لَـبَّـيْـكَ الـلَّـهُمَّ لَـبَّـيْـكَ
“labbayk allaahumma labbayk,
“Mo present, oh Allaah, mo present.
لَـبَّـيْـكَ لَا شَـرِيْـكَ لَـكَ لَـبَّـيْـكَ
labbayk laa shariika laka labbayk,
Mo present, To pas ena aucun associé, mo present.
إِنَّ الْحَـمْـدَ وَالنِّـعْـمَـةَ لَـكَ وَالْـمُـلْـكَ
innal hamda wan ni’mata laka wal mulk,
Tous louanges et faveurs pour Toi et la royauté (aussi).
لَا شَـرِيْـكَ لَـكَ
laa shariika lak”
To pas ena aucun associé.”
Bans quitechoses qui pas gagne droit faire dans l’etat Ihraam :
(a) Pour missiers et madames:
Taille cheveux oubien moustache oubien raze embas le bras oubien raze cote partie privée.
Taille zongles.
Servi parfum.
Marier oubien deboute comme papa (Wali).
Faire demande pour mariage.
Caresse ou madame oubien embrasse li oubien gagne relation avec li.
Alle la chasse oubien aide quicaine pour la chasse.
(b) Pour bans missiers seulement:
Mette chemise, pantalons, sous-vêtements.
Couvert la tête.
Couvert cheville avec chausette oubien soulier.
(c) Pour bans madames seulement:
Couvert figure.
Mette les gants.
L’ACCOMPLISSEMENT DE L’UMRAH.
Quand nous arrive a Haram Makkah, nous arrete faire Talbiyah.
Nous rentre dans Masjid par n’importe qui la porte, avec lipied droite et nous lire :
الـلَّـهُمَّ صَـلِّ عَـلَـى مُـحَـمَّـدٍ وَّسَـلِّـمْ
“Allaahumma swalli alaa muhammadin wasallim
“Oh Allaah, envoye Swalaat et la paix lor Muhammad.”
الـلَّـهُمَّ افْـتَـحْ لِـي أَبْـوَابَ رَحْـمَـتِـكَ
Allaahummaf tahlii abwaaba rahmatik”
“Oh Allaah ouvert pour moi bans la portes de To Rahmah."
Quand nous trouve Ka’bah, nous leve nous deux la mains et nous faire n’importe qui Duaa qui nous oulé. Nous capave aussi dire :
الـلَّـهُمَّ أَنْـتَ السَّـلَامُ وَمِـنْـكَ السَّـلَامُ فَـحَـيِّـنَا رَبَّـنَا بِالسَّـلَامِ
“Allaahumma antas salaam, wa minkas salaam fahayyinaa rabbanaa bis salaam”
“Oh Allaah c'est Toi la paix, et la paix sorti depuis cote Toi, et alors garde nous vivants, oh nous Rab, avec la paix.”
Avant commence faire Twawaaf, nous decouvert nous zépaule droite par mette coté droite de nous Ridaa embas nous le bras droite.
Nous vine cote Al-Hajar-Ul-Aswad (la pierre noire). Nous tourne vers li et nous dire :
بِـسْـمِ الـلَّـهِ والـلَّـهُ أَكْـبَـرْ
“Bismillaahi wallaahu Akbar”
“Au nom d'Allaah, et Allaah plus grand.”
Si nous capave, nous touche li avec nous la main droite et nous embrasse li.
Si nous pas capave embrasse li, nous touche li avec nous la main droite et nous embrasse nous la main.
Si nous pas capave touche li avec nous la main, nous simplement leve nous la main droite seulement vers li et nous pas embrasse nous la main.
Nous mette Ka’bah dans nous coté gauche et nous faire sept tours.
Pendant Twawaaf, nous faire n’importe qui Duaa dans n’importe qui langage, et li preferable qui nous faire Duaa dans langage qui nous comprend; nous capave aussi lire Quran, faire Zikr et Istighfaar.
A chaque fois qui nous arrive cote Al-Hajar-ul-Aswad, nous dire : “Allaahu Akbar” et nous touche li si nous capave, sinon nous simplement leve nous la main droite vers li.
Pendant 3 premiers tours, li Sunnah qui bans missiers faire ene ti-galop en ti-pas. Pour bans madames, li pas recommandé qui zotte faire sa ti-galop la.
Pandant 4 derniers tours, nous marche normale.
A chaque fois qui nous arrive cote Ar-Rukn-Ul-Yamaani, nous touche li avec nous la main droite, et si nous pas reussi touche li, nous continué marche normale sans leve nous la main vers li.
Entre Ar-Rukn-Ul-Yamaani et Al-Hajar-Ul-Aswad, li Sunnah qui nous lire :
رَبَّـنَا آتِـنَا فِـي الدُّنْـيَا حَـسَـنَـةً وَفِـي الْآخِـرَةِ حَـسَـنَـةً وَقِـنَا عَـذَابَ الـنَّارِ
“Rabbanaa aatinaa fid dunyaa hasanah, wafil aakhirati hasanah, wa qinaa Azaaban naar”
“Oh nous Rab donne nous dans Dunyaa cequi bon et dans Aakhirat cequi bon et protege nous contre punition du feu (l'enfer).”
Apres Twawaaf, nous couvert nous deux zepaules.
Nous vine faire 2 Rakaats par derrière Maqaam-u-Ibraahim. Nous deboute derrière Maqaam-u-Ibrahim en mettant Maqaam-u-Ibrahim entre nous et Ka’bah, et si nous pas reussi, nous capave aussi alle jusqu’a par derrière dans Masjid Haraam.
Quand nous vine cote Maqam-U-Ibrahim, nous lire sa Aayat la :
وَاتَّـخِـذُوا مِـنْ مَّـقَامِ إِبْـرَاهِـيْـمَ مُـصَـلًّى
“Wat takhizou mim Maqaami Ibraahiima muswallaa”
“Et prend l'endroit cote Ibrahiim ti debouté comme ene place pour faire Swalaat.”
Nous prend nous Sutrah et nous faire 2 Rakaats courts;
dans premier Rakaat nous lire :
”Qul Yaa Ayyuhal Kaafiroun”
et dans deuxieme Rakaat nous lire :
”Qul Huwallaahu Ahad”
Nous pas laisse personne passe entre nous et nous Sutrah.
Apres sa 2 Rakaats la, li Sunnah pour nous alle boire de l’eau Zamzam et nous mouille nous la tete aussi avec sa de l’eau la.
Ensuite nous retourne cote Al-Hajr-Ul-Aswad, nous dire : “Allaahu Akbar” et nous touche li avec la main droite si nous capave.
Ensuite nous vine cote colline Swafaa pour faire Sai (ene la marche).
Quand nous approche avec colline Swafaa, nous lire sa Aayat la :
إِنَّ الصَّـفَا وَالْـمَـرْوَةَ مِـنْ شَـعَائِـرِ الـلَّـهِ
فَـمَـنْ حَـجَّ الْـبَـيْتَ أَوْ اعْـتَـمَـرَ فَـلَا جُـنَاحَ عَـلَـيْـهِ أَنْ يَّـطَّـوَّفَ بِـهِـمَا
وَمَـنْ تَـطَـوَّعَ خَـيْـرًا فَـإِنَّ الـلَّـهَ شَاكِـرٌ عَـلِيْمٌ
“Innas Swafaa wal Marwata Min Sha-aaaa-Irillaah. Fa Man Hajjal Bayta Awi’tamara Falaa Junaaha Alaihi anyyat twaw wafa bihimaa Waman ta taw wa-a khayrann fa innallaaha Shaakirun Aliim“
“Swafaa et Marwah c'est parmi bans signes d’Allaah. Alors, n’importe qui sanla qui faire Hajj oubien Umrah, li pas gagne aucun peché par faire va-et-vient entre sa deux (collines) la. Et n’importe qui sanla faire ene bon action de so propre gré, Allaah Li Reconnaissant et Li conne tout.”
Nous aussi dire :
نَـبْـدَأُ بِـمَا بَـدَأَ الـلَّـهُ بِـهِ
“Nabda-u bimaa bada-Allaahu bih“
“Nous commence par cequi Allaah fine commencé.”
Nous monte lor colline Swafaa et li pas necessaire qui nous monte la haut jusqu’a touche muraille.
Nous deboute vers Ka’abah et nous dire :
اللَّـهُ أَكْـبَـرُ اللَّـهُ أَكْـبَـرُ اللَّـهُ أَكْـبَـرْ
“Allaahu Akbar Allaahu Akbar, Allaahu Akbar”
“Allaah plus grand, Allaah plus grand, Allaah plus grand. ”
Ensuite nous faire Tahliil :-
لَا إِلَـهَ إِلَّا اللَّـهُ وَحْـدَهُ لَا شَـرِيْـكَ لَـهُ لَـهُ الْـمُـلْكُ وَلَـهُ الْحَـمْـدُ يُـحْـيِي وَيُـمِيْـتُ وَهُـوَ عَـلَى كُـلِّ شَـيْءٍ قَـدِيْـرٌ
“Laa ilaaha illalaahu wahdahou laa shariikalah, lahul mulku walahul hamd, yuhyii wa yumiit, wa huwa alaa kulli Shay-inn Qadiir.
“Pas ena aucun vrai Ilaah excepté Allaah, Li Unique, Li pas ena aucun associé. Pour Li la royauté et louange. Li donne la vie et Li donne la mort et Li ena pouvoir lor tous quitechoses.”
لَا إِلَـهَ إِلَّا اللَّـهُ وَحْـدَهُ لَا شَـرِيْـكَ لَـهُ أَنْـجَـزَ وَعْـدَهُ وَنَـصَـرَ عَـبْـدَهُ وَهَـزَمَ الْأَحْـزَابَ وَحْـدَهُ
Laa illaaha illallaahu wahdahou laa shariikalah, Anjaza wa’dah, wa naswara a’bdah, wahazamal Ahzaaba wahdah.”
“Pas ena aucun vrai Ilaah excepté Allaah, Li unique, Li pas ena aucun associé, Li fine accomplir So promesse, Li fine aide (donne victoire a) So esclave et Li Tout seul fine detruire bans alliés (Kuffaar).”
Nous faire Tahliil 3 fois et entre chaque fois nous demande nimporte qui Duaa qui nous oulé dans nimporte qui langage.
Nous descendre depuis colline Swafaaa et nous commence faire Sai, en marchant. Pendant nous la marche, nous capave faire n’importe qui Duaa dans n’importe qui langage. Nous capave lire Quran, faire Zikr, Istighfaar et nous capave aussi lire sa d Duaa la :
رَبِّ اغْـفِرْ وَارْحَـمْ إِنَّـكَ أَنْـتَ الْأَعَـزُّ الْأَكْـرَمُ
“Rabbigh fir war ham innaka antal a-azzul Akram”
“Oh mo Rab pardonnez et gagne pitié. Certainement Toi To Le Plus Puissant, Le plus Genereux.”
Quand nous trouve ene la lumière vert, nous galope plus vite possible jusqu’a qui nous trouve ene l’autre la lumière vert. Quant-a bans madames, zotte bizin marche normale.
Ensuite nous marché jusqu’a qui nous monte lor colline Marwah. Nous deboute vers Ka’bah et nous faire pareille couma nous ti faire a colline Swafaa excepté qui nous pas lire sa Aayat la : “Innas Swafaa wal Marwata .......” et nous pas lire sa Duaa’ la : “Nabda-u bimaa bada-Allaahu bih”.
Depuis Swafaa jusqu'a Marwah c’est ene tour, et alors nous termine nous 7 tours lor Marwah.
Apres Sai entre Swafaa-Marwah, bans zommes taille zotte cheveux courte, et ensuite zotte raze zotte la tete le 10 Zul Hijjah.
Quant-a bans madames, zotte taille zotte cheveux longueur boute zotte le doigt.
Quand nous fini taille nous cheveux, nous sorti depuis l’etat Ihraam et nous endroit faire bans actions qui nous pas ti endroit faire dans l’etat Ihraam.
8ème ZUL HIJJAH
Li Sunnah pour prend ene bain et li Sunnah qui bans missiers parfume zotte le corps.
Nous mette nous linge Ihraam.
Nous rentre dans l’etat Ihraam dans place cote nous pe resté par prononce :
لَـبَّـيْـكَ الـلَّـهُمَّ حَـجًا
“labbayk allaahumma hajjan”
“Mo present (mo pe repondre To l'appel) oh Allaah pour ene Hajj.”
Nous capave aussi dire :
اللَّـهُمَّ هَـذِه حَـجَّـةٌ لَا رِيَاءَ فِـيْـهَا وَلَا سُـمْـعَـةَ
”Allaahumma haazihi hajjatul laa riyaaa-a fiihaa walaa sum-ah”
“Oh Allaah sa c'est ene Hajj qui pas pe faire li pour montrer dimounes oubien pour faire dimounes tender.”
Nous commence faire Talbiyah et nous continué jusqu’a le 10 Zul Hijjah; nous pas arreté aussi longtemps qui nous pas fine batte Jamrat-Ul-Aqabah.
Ensuite nous dirige vers Minaa et nous reste labas jusqu’a lendemain, apres levé du soleil.
A Minaa, pas ena aucun Ibaadat speciale pour faire, mais nous faire Swalaat Zuhr 2 Rakaats dans so l’heure, Asr 2 Rakaats dans so l’heure, Maghrib 3 Rakaats dans so l’heure, Esha 2 Rakaats dans so l’heure, Fajr 2 Rakaats dans so l’heure.
Nous pas faire aucun Sunnat excepté 2 Sunnat Fajr et Witr.
9ème ZUL HIJJAH
Apres qui soleil fine levé, nous quitte Minaa et nous dirige vers Arafat en recitant Talbiyah.
Apres Zawaal; donne ene Azaan, donne Iqaamat et faire Swalaat Zuhr 2 Rakaats; et tout de suite donne ene deuxième Iqaamat et faire Swalaat Assr 2 Rakaats.
Apres Swalaat Zuhr et Assr, nous tourney nous vers Qiblah, nous leve nous deux lamains et nous engage nous dans Duaa et Talbiyah. Nous capave faire n’importe qui Duaa dans n’importe qui langage, nous capave aussi faire lecture Quran, Zikrullaah et Istighfaar.
Li recommandé qui nous faire sa Zikr la beaucoup :
لَا إِلَـهَ إِلَّا اللَّـهُ وَحْـدَهُ لَا شَـرِيْـكَ لَـهُ
لَـهُ الْـمُـلْكُ وَلَـهُ الْحَـمْـدُ
وَهُـوَ عَـلَى كُـلِّ شَـيْءٍ قَـدِيْـرٌ
“Laa ilaaha illallaahu wahdahou laa shariikalah,lahul mulku walahul hamd, wa huwa alaa kulli shay-inn qadiir”.
“Pas ena aucun Ilaah excepté Allaah, Li unique, Li pas ena aucun associé. Pour Li la royauté et louange et Li ena pouvoir lor tous quitechoses.”
Nous continué faire sa bans Ibadaats la jusqu’a couché du soleil.
Apres qui soleil fine couché, nous dirige vers Muzdalifah en toute calme, et en recitant Talbiyah.
Quand arrive Muzdalifah, donne ene Azaan, donne Iqaamat et faire Swalaat Maghrib 3 Rakaats, donne ene deuxième Iqaamat et faire Swalaat Esha 2 Rakaats.
Nous pas faire aucun Sunnat entre sa 2 Swalaat la, et nous aussi pas faire aucun Swalaat Nafil apres Esha.
Li Sunnah qui nous dormi jusqu’a Swalaat Fajr.
Bans vieux dimounes, bans madames et bans zenfants endroit quitte Muzdalifah apres la moitié la nuit.
10ème ZUL HIJJAH
Nous faire Swalaat Fajr dans Muzdalifah.
Apres Swalaat, nous faire face Qiblah et nous faire Zikrullaah et Duaa jusqu’a qui le ciel vine clair.
Avant soleil levé – quand le ciel fine vine clair – nous dirige vers Minaa en recitant Talbiyah.
Quand nous arrive Minaa, nous ramasse 7 ti-roches et nous envoye li lor Jamrat-Ul-Aqabah.
Nous faire face Jamrat-Ul-Aqabah en mettant Makkah dans nous coté gauche et Minaa dans nous coté droite.
Chaque ti-roche qui nous envoyé nous dire : “Allaahu Akbar”.
Apres qui nous fine envoye 7ème ti-roche, nous arrete faire Talbiyah et nous sorti depuis l’etat Ihraam – meme si nous pas encore raze la tete - excepté qui nous pas endroit gagne relation avec nous madames.
Apres batte Jamrat-Ul-Aqabah, li Sunnah qui nous change nous linge et bans zommes parfume zotte.
Nous faire Qurbani a Minaa, et nous capave faire li dans n’importe qui place dans Minaa, meme jusqu’a dans Makkah.
Li meilleur faire Qurbani avec nous propre la main. Mais si nous pas faire li, nous endroit faire ene l’autre frère qui nous ena confiance lor li pour faire nous Qurbani pour nous.
Nous endroit faire Qurbani le 10,11,12,13 Zul Hijjah.
Nous raze nous la tete de droite a gauche, oubien nous taille nous cheveux. Meilleur c’est qui nous razé.
Nous vine Makkah et nous faire Twawaaf Ka’bah 7 tours. Apelle sa Twawaaf la : Twawaaf-Ul-Ifaadwah. Si nous pas ti encore tire nous linge Ihraam, nous pas decouvert nous zepaule droite.
Nous pas faire ti-galop dans 3 premiers tours.
Nous faire 2 Rakaats par derrière Maqaamu-Ibrahim et nous faire Sai entre Swafaa-Marwah 7 fois.
Apres sa, nous sorti depuis l’etat Ihraam totallement et nous endroit gagne relation avec nous madames.
AYYAAM-UT-TASHRIIQ
(11ème,12ème,1 ème ZUL HIJJAH)
Apres qui nous fine faire les 5 rites du 10ème Zul-Hijjah, nous retourne Minaa et nous passe les nuits et les jours du 11ème et 12ème Zul Hijjah. Labas si nous oulé, nous reste jusqu’a 13ème Zul Hijjah.
Pendant sa trois jours la, apres Zawaal nous batte les 3 Jamaraat.
Nous envoye 7 ti-roches lor Al-Jamrat-Us-Sughraa. Ensuite nous bouge ene tigit coté droite, nous deboute vers Qiblah, nous leve deux lamains et nous faire Duaa pendant ene longue moment.
Nous envoye 7 ti-roches lor Al-Jamrat-Us-Wustwaa. Ensuite nous bouge ene tigit coté gauche, nous deboute vers Qiblah, nous leve deux lamains et nous faire Duaa pendant ene longue moment.
Nous faire face Jamrat-Ul-Aqabah en mettant Makkah dans nous coté gauche et Minaa dans nous coté droite et nous envoye 7 ti-roches. Nous pas faire Duaa apres sa.
Nous dire “Allaahou Akbar” avec chaque ti-roche qui nous envoyé.
Nous batte sa 3 Jamarats la en l’ordre.
Pendant Ayyaam-Ut-Tashriiq, li Sunnah qui nous alle batte les 3 Jamaraat depuis nous la tente en marchant et nous retourné en marchant.
Nous endroit retourne depuis Minaa apres 2 jours (apres qui nous fine fini batte 3 Jamaraat). Si nous oulé, nous retourne apres 3 jours pareille couma le prophete ti faire.
Si nous pas ena l'intention pour reste Minaa pour le 13 Zul Hijjah, le 12 Zul Hijjah nous bizin quitte Minaa avant qui soleil fine couché.
Apres 2 ou 3 jours a Minaa, nous retourne Makkah.
DERNIER JOUR A MAKKAH APRES HAJJ
Avant qui nous quitte Makkah pour retourne Maurice directement oubien par passe Madinah pour Ziyaarat, nous bizin faire ene dernier Twawaaf qui connu comme : “Twawaaf-Ul-Wadaa”.
Apres sa Twawaaf la, nous faire nous 2 Rakaats derrière Maqam-U-Ibraahim.
Nous sorti depuis Masjid Haram avec lipied gauche et nous lire :
الـلّـهُـمَّ صَـلِّ عَـلَـى مُـحَـمَّـدٍ وَسَـلِّـمْ
“Allaahumma swalli alaa muhammadin wa sallim
“Oh Allaah, envoye Swalaat et la paix lor Muhammad.”
الـلَّـهُـمَّ إِنِّـي أَسْـأَلُـكَ مِـنْ فَـضْـلِـكَ
Allaahumma innii as-aluka minn fadlik”
“Oh Allaah mo pe demande Toi de To faveur.”
Li Sunnah qui nous amene de l’eau Zamzam avec nous.
ALHAMDULILLAAH HAJJ FINE TERMINÉ.
ZIYAARAT MASJID NABAWI A MADIINAH.
Ziyaarat Masjid Nabawi c’est ène action qui l’Islaam fine encourage nous pour faire.
Qui Faire Nous Vine Madiinah?
Nous vine Madiinah avec l’intention pour faire Swalaat dans Masjid Nabawi qui equivalent a 1000 Swalaat. Ensuite quand nous fine fini arrive Madiinah, nous saisit l’occasion pour faire Ziyaarat Qabr du prophète Muhammad.
Qui Relation Ziyaarat Madiinah Ena Avec Hajj?
Pas ena aucun relation entre Ziyaarat Madiinah et Hajj oubien Umrah. N’importe qui sanla faire Hajj sans faire Ziyaarat Madiinah, so Hajj complete. Et n’importe qui sanla faire Ziyaarat Madiinah sans faire Hajj, li gagne Thawab Ziyaarat complete. Donc, si pas ena aucun relation entre Ziyaarat Medinah et Hajj, pas ena narien qui dire qui “Meilleur faire Hajj avant Ziyaarat Madiinah, oubien meilleur faire Ziyaarat Madiinah avant Hajj!”
Couma Faire Ziyaarat A Medinah?
Nous rentre dans Masjid avec lipied droite et nous lire Duaa rentre dans Masjid.
Nous faire 2 Rakaats Tahiyyat-ul-Masjid oubien nous faire Swalaat Farz en Jamaat si nous fine rentre dans l’heure Swalaat.
Nous capave aussi faire Swalaat dans Ar-Rawdwah (Jannat ka Tukra).
Nous envoye le prophète Salaam.
Pas ena aucun façon speciale pour faire le prophète Salaam côte so Qabr, mais li meilleur si nous faire salaam pareille couma le Swahaabi Ibn Umar ti pé faire quand li ti pe retourne depuis voyage :
السَّـلَامُ عَـلَـيْـكَ يَا رَسُولَ اللَّـه وَرَحْـمَـةُ اللَّـهِ وَبَـرَكَاتُـهُ
Assalaamu alayka Yaa Rassoulallaah, wa rahmatullaahi wa barakaatuh
“La paix lor toi, oh messager d’Allaah, et (aussi) pitié d’Allaah et So benedictions.”
Nous envoye Salaam lor le Swahaabi Abu Bakr :
السَّـلَامُ عَـلَـيْـكَ يَا أَبَا بَـكْـرٍ
Assalaamu alayka Yaa Abaa Bakr
“La paix lor toi oh Abu Bakr.”
Nous envoye Salaam lor le Swahaabi Umar :
السَّـلَامُ عَـلَـيْـكَ يَا عُـمَـرُ
Assalaamu alayka Yaa Umar
“La paix lor toi Oh Umar.”
Nous faire Salaam lor bans qui fine enterrés dans Qabarastaan Baqii’-ul-Gharqad et nous faire Duaa pour zotte. Nous dire :
السَّـلَامُ عَـلَـيْـكُمْ أَهْـلَ دَارِ قَـوْمٍ مُـؤْمِـنِـيْـنَ فَـإِنَّا وَإِيَّـاكُمْ وَمَا تُـوْعَـدُوْنَ غَـدًا مُـؤَجَّـلُوْنَ وَإِنَّا إِنْ شَاءَ اللَّـهُ بِـكُمْ لَاحِـقُوْنَ اللَّـهُـمَّ اغْـفِـرْ لِأَهْـلِ بَـقِـيْـعِ الْـغَـرْقَـدِ
“Assalaamu alaykum, Ahla Daari Qawmin Mu’miniin wa innaa wa iyyaakum wamaa tou-adouna ghadan mu-ajjaloun. Wa innaa inshaaa Allaahou bikum laahiqoun. Allaahoummagh fir li ahli Baqii’-il-Gharqad.”
“La paix lor zotte, oh bans habitants de Qabr de bans dimounes croyants. Certainement nous et zotte et cequi zotte fine être promis, pé vini demain. Et Inshaa Allaah nous pé vine joindre zotte. Oh Allaah pardonne bans habitants de Baqii’-al-Gharqad.”
Nous faire Salaam lor bans Shahiid de Uhud et nous faire Duaa pour zotte. Pas ena aucun façon speciale pour faire Salaam lor banla, mais nous lire Duaa visite Qabarastaan et nous faire Duaa pour zotte.
Nous faire Swalaat dans Masjid Qubaa.
No comments:
Post a Comment